ಬೆಂಗಳೂರು : ಅದ್ಯಾಕೋ ಈ ಬಾರಿ ಐಪಿಎಲ್ನಲ್ಲಿ ಕಿಂಗ್ ಕೊಹ್ಲಿಗೆ ಅದೃಷ್ಟ ಕೈಕೊಟ್ಟಿದೆ. ಕ್ಯಾಪ್ಟನ್ಸಿ ತ್ಯಜಿಸಿದ್ರೂ ಬ್ಯಾಡ್ ಲಕ್ ಬಿಟ್ಟು ಹೋಗಿಲ್ಲ. ಆರ್ಸಿಬಿ ತಂಡ ಉತ್ತಮ ಪ್ರದರ್ಶನ ನೀಡ್ತಿದ್ರೂ ಕೊಹ್ಲಿ ಮಾತ್ರ ರನ್ ಬರ ಎದುರಿಸ್ತಿದ್ದಾರೆ. ಪಂದ್ಯ ನಡೆದಾಗಲೆಲ್ಲಾ ವಿರಾಟ್ ಆರ್ಭಟಿಸ್ತಾರೆ ಅಂತಾ ಫ್ಯಾನ್ಸ್ ಬಕ ಪಕ್ಷಿಯಂತೆ ಕಾದು ಕುಳಿತಿದ್ದಾರೆ. ಆದ್ರೆ ಆ ಆಸೆಗೆ ಪ್ರತಿ ಪಂದ್ಯದಲ್ಲಿ ವಿರಾಟ್ ಕೊಳ್ಳಿಯಿಡ್ತಿದ್ದಾರೆ.
ಹೌದು, ಮೊದಲ ಆರು ಪಂದ್ಯಗಳಲ್ಲಿ ನೀರಸ ಆಟವಾಡಿ ಕೊಹ್ಲಿ ಫ್ಯಾನ್ಸ್ ಕೆಂಗಣ್ಣಿಗೆ ಗುರಿಯಾಗಿದ್ರು. ತಂಡದಿಂದ ವಿರಾಟ್ಗೆ ಗೇಟ್ಪಾಸ್ ಕೊಡ್ಬೇಕು ಅನ್ನೋ ಟಾಕ್ಸ್ ಕೇಳಿ ಬಂದಿತ್ತು. ಈಗ ಆ ಪಿತ್ತ ಮತ್ತಷ್ಟು ನೆತ್ತಿಗೇರುವಂತೆ ಮಾಡಿದ್ದಾರೆ. ಮೊನ್ನೆ ಹೈದ್ರಾಬಾದ್ ವಿರುದ್ಧ ಕೊಹ್ಲಿ ಮತ್ತೆ ಸೊನ್ನೆ ಸುತ್ತುವ ಮೂಲಕ ಫ್ಯಾನ್ಸ್ ಕೆರಳಿ ಕೆಂಡಾಮಂಡಲರಾಗುವಂತೆ ಮಾಡಿದ್ದಾರೆ.
ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧ ಡಕೌಟ್ ಆಗಿದ್ದ ಕೊಹ್ಲಿ, ಹೈದ್ರಬಾದ್ ವಿರುದ್ಧವೂ ಅದನ್ನೇ ಮುಂದುವರಿಸಿದ್ರು. ಎದುರಿಸಿದ ಮೊದಲ ಎಸೆತದಲ್ಲೇ ಕ್ಯಾಚ್ ನೀಡಿ ಪೆವಿಲಿಯನ್ ಸೇರಿದ್ರು. ಆ ಮೂಲಕ ಬ್ಯಾಕ್ ಟು ಬ್ಯಾಕ್ ಡಕೌಟ್ ಲಿಸ್ಟ್ಗೆ ಸೇರಿಕೊಂಡ್ರು. ಇನ್ನು ವಿರಾಟ್ ಸೊನ್ನೆ ಸುತ್ತುತ್ತಿರೋದನ್ನ ಕಂಡು ಅಭಿಮಾನಿಗಳು ಕೆರಳಿದ್ದು, ಕೊಹ್ಲಿಯನ್ನ ‘ಡಕಪ್ಪ’ ಎಂದು ಟ್ರೋಲ್ ಮಾಡ್ತಿದ್ದಾರೆ.
2017, ಏಪ್ರಿಲ್ 23. ಈ ದಿನವನ್ನ ಆರ್ಸಿಬಿ ಫ್ಯಾನ್ಸ್ ಎಂದೂ ಮರೆಯಲು ಸಾಧ್ಯವಿಲ್ಲ. ಯಾಕಂದ್ರೆ ಆರ್ಸಿಬಿ ತಂಡ ಈ ದಿನ ಐಪಿಎಲ್ ಹಿಸ್ಟರಿಯಲ್ಲಿ ಜಸ್ಟ್ 49 ರನ್ಗೆ ಆಲೌಟಾಗಿತ್ತು. ಆ ಪಂದ್ಯದಲ್ಲಿ ಕೊಹ್ಲಿ ಸೊನ್ನೆ ಸುತ್ತಿದ್ರು. ಮೊನ್ನೆ ಪಂದ್ಯದಲ್ಲೂ ವಿರಾಟ್ ಡಕೌಟ್ ಆಗುವ ಮೂಲಕ ಕೊಹ್ಲಿ ಐದು ವರ್ಷದ ಡಕೌಟ್ ಚಾಲೆಂಜ್ ಗೆದ್ದಿದ್ದಾರೆ ಎಂದು ಫ್ಯಾನ್ಸ್ ಕಾಲೆಳೆಯುತ್ತಿದ್ದಾರೆ.
ಇನ್ನು ಇಷ್ಟಕ್ಕೆ ಸುಮ್ಮನಾಗದ ಫ್ಯಾನ್ಸ್, ಎಬಿಡಿ ಐಪಿಎಲ್ ಆರಂಭಕ್ಕೂ ಮುನ್ನ ಕೊಹ್ಲಿ ಈ ಸಲ 600 ರನ್ ಸಿಡಿಸಲಿದ್ದಾರೆ ಎಂದಿದ್ರು. ಸದ್ಯ ಅದೇ ಮಾತು ಫ್ಯಾನ್ಸ್ಗೆ ಅಸ್ತ್ರವಾಗಿದ್ದು, ಎಬಿಡಿ ನೀವು ಜೋಕ್ಸ್ ಮಾಡ್ಬೇಡಿ ಎನ್ನುವ ಮೂಲಕ ಕೊಹ್ಲಿಯನ್ನ ಕಿಚಾಯಿಸಿದ್ದಾರೆ.
ಪ್ರಸಕ್ತ ಐಪಿಎಲ್ನಲ್ಲಿ ಕೊಹ್ಲಿ ದಯನೀಯ ವೈಫಲ್ಯ ಅನುಭವಿಸ್ತಿದ್ದಾರೆ. ಈವರೆಗೆ ಆಡಿದ 8 ಪಂದ್ಯಗಳಿಂದ ಬರೀ 119 ರನ್ ಗಳಿಸಿದ್ದಾರೆ. 2 ಬಾರಿ ಡಕೌಟ್ ಆದ್ರೆ 4 ಬಾರಿ ಎರಡಂಕಿ ದಾಟಿದ್ದಾರೆ. ಇನ್ನು 48 ಇವರ ಬ್ಯಾಟ್ನಿಂದ ಮೂಡಿ ಬಂದ ಈವರೆಗಿನ ಬೆಸ್ಟ್ ಸ್ಕೋರ್ ಆಗಿದೆ.