ಮುಂಬೈ : ಸುಶಾಂತ್ ಸಿಂಗ್ ರಾಜಪೂತ್ ಆತ್ಮಹತ್ಯೆ ಪ್ರಕರಣ ರಾಷ್ಟ್ರಾದ್ಯಂತ ಸಂಚಲನ ಸೃಷ್ಟಿಸುತ್ತಿರುವಂತೆಯೇ ಮುಂಬೈನಲ್ಲಿ ಮತ್ತೊಬ್ಬ ನಟರು ಆತ್ಮಹತ್ಯೆ ಮಾಡಿಕೊಂಡಿರುವುದು ತಿಳಿದುಬಂದಿದೆ. 44 ವರ್ಷದ ಕಿರುತೆರೆ ನಟ ಸಮೀರ್ ಶರ್ಮಾ ನಿನ್ನೆ ರಾತ್ರಿ ತಮ್ಮ ನಿವಾಸದಲ್ಲಿ ನೇಣುಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ಎರಡು ದಿನದ ಹಿಂದೆ ಅವರು ಸಾವನ್ನಪ್ಪಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ಆದರೆ, ಸಾವಿಗೆ ಏನು ಕಾರಣ ಎಂಬುದು ಗೊತ್ತಾಗಿಲ್ಲ.
ಮಲದ್ ವೆಸ್ಟ್ನ ನೇಹಾ ಸಿಎಚ್ಎಸ್ ಬ್ಯುಲ್ಡಿಂಗ್ನಲ್ಲಿರುವ ಅವರ ಅಪಾರ್ಟ್ಮೆಂಟ್ನಲ್ಲಿ ಸಮೀರ್ ಶರ್ಮಾ ಅವರ ಮೃತ ದೇಹವನ್ನು ಮೊದಲು ಕಂಡವರು ವಾಚ್ಮ್ಯಾನ್. ರಾತ್ರಿ ಭದ್ರತೆ ಪರಿಶೀಲಿಸುವ ವೇಳೆ ಫ್ಯಾನಿಗೆ ನೇಣುಬಿಗಿದುಕೊಂಡಿದ್ದ ಮೃತ ದೇಹವನ್ನು ಕಿಟಕಿಯಿಂದ ಕಂಡ ವಾಚ್ಮ್ಯಾನ್ ಕೂಡಲೇ ಬ್ಯುಲ್ಡಿಂಗ್ ಸೂಪರ್ವೈಸರ್ಗೆ ತಿಳಿಸಿದ್ದಾನೆ. ನಂತರ ಪೊಲೀಸರಿಗೆ ಮಾಹಿತಿ ಹೋಗಿದೆ. ಸ್ಥಳಕ್ಕೆ ಬಂದ ಪೊಲೀಸರಿಗೆ ಯಾವುದೇ ಸೂಸೈಡ್ ನೋಟ್ ಸಿಕ್ಕಿಲ್ಲ. ಮಲದ್ ಠಾಣೆಯ ಪೊಲೀಸರು ಇದೊಂದು ಆಕಸ್ಮಿಕ ಸಾವು ಎಂದು ಪ್ರಕರಣ ದಾಖಲಿಸಿದ್ದಾರೆ.
