ಪೆರ್ಲ: ಭಾರತದ ನಾನಾ ರಾಜ್ಯಗಳಲ್ಲಿನ ಬೇರೆ ಬೇರೆ ನೋಂದಣಿ ವ್ಯವಸ್ಥೆಗಳು ಮತ್ತು ತೆರಿಗೆ ರಚನೆಯಿಂದಾಗಿ ವಾಹನ ಮಾಲೀಕರಿಗೆ ಎದುರಾಗುವ ಸಮಸ್ಯೆ ತಪ್ಪಿಸಲು ಕೇಂದ್ರ ಸರಕಾರ ಏಕೀಕೃತ ನೋಂದಣಿ ಭಾರತ್‌ (ಬಿ.ಎಚ್‌.) ಸೀರೀಸ್‌ ನೋಂದಣಿ ಪರಿಚಯಿಸಿದೆ.
ವಾಹನದ ನೋಂದಣಿಯನ್ನು ಬದಲಾಯಿಸದೆ ದೇಶಾದ್ಯಂತ ಸಂಚರಿಸಲು ವಾಹನದ ತೆರಿಗೆಯಲ್ಲಿ ವಿನಾಯಿತಿ ಸಿಗುವ ಈ ಯೋಜನೆಯನ್ನು ಕರ್ನಾಟಕ ಮತ್ತು ತಮಿಳುನಾಡು ಕಾರ‍್ಯಗತಗೊಳಿಸಿದರೂ, ರಸ್ತೆ ತೆರಿಗೆ ನಿಗದಿ ಕುರಿತಾಗಿ ತರ್ಕ ಉಂಟಾದ ಪರಿಣಾಮ ಕೇರಳ ಸರಕಾರ ಯೋಜನೆ ಕಾರ‍್ಯಗತಗೊಳಿಸಲು ಮುಂದಾಗಿಲ್ಲ. ಭಾರತದಲ್ಲಿ ಅತಿ ಹೆಚ್ಚು ವಾಹನ ತೆರಿಗೆ ವಸೂಲಿ ಮಾಡುತ್ತಿರುವ ರಾಜ್ಯಗಳಲ್ಲಿ ಕೇರಳ ಮುಂದಿದೆ. ಕೇರಳವು ವಾಹನಗಳ ಬೆಲೆಯ ಮೇಲೆ ಶೇ. 21ರವರೆಗೆ ತೆರಿಗೆ ವಿಧಿಸುತ್ತಿದೆ. ಬಿಎಚ್‌ ವಾಹನಗಳಿಗೆ ವಾಹನ ಬೆಲೆಯ ಶೇ. 8-12 ಮಾತ್ರ ವಿಧಿಸಬಹುದಾಗಿದೆ.
ಬಿ.ಎಚ್‌. ಸೀರೀಸ್‌ ಕಾರ‍್ಯಗತಗೊಳಿಸಿದರೆ ಕೇರಳಕ್ಕೆ ದೊರೆಯುವ ಆದಾಯದಲ್ಲಿ ಪ್ರತಿ ವರ್ಷ 670 ಕೋಟಿ ರೂ. ನಷ್ಟವಾಗಲಿದೆ. ಈ ತೆರಿಗೆ ನಷ್ಟದ ಭಯದಿಂದಾಗಿ ಕೇರಳ ಸರಕಾರ ಭಾರತ್‌ ಸೀರೀಸ್‌ ಯೋಜನೆಗೆ ತೀವ್ರ ವಿರೋಧ ವ್ಯಕ್ತಪಡಿಸಿದೆ. ಎಲ್ಲ ರಾಜ್ಯಗಳೂ ಬಿ.ಎಚ್‌. ಸೀರೀಸ್‌ ನೋಂದಣಿಯನ್ನು ಕಾರ್ಯಗತಗೊಳಿಸುವಂತೆ ಕೇಂದ್ರ ಸರಕಾರ ಆದೇಶ ನೀಡಿ ಒಂಬತ್ತು ತಿಂಗಳು ಕಳೆದಿದೆ. ಬಿ.ಎಚ್‌ ಸೀರೀಸ್‌ ನೋಂದಣಿಯನ್ನು ತಾತ್ಕಾಲಿಕವಾಗಿ ನಿಲ್ಲಿಸುವಂತೆ ಕೇರಳ ಸರಕಾರ ಕೇಂದ್ರ ಸರಕಾರಕ್ಕೆ ಪತ್ರ ಬರೆದಿದ್ದು, ಕೇಂದ್ರ ಇದನ್ನು ತಿರಸ್ಕರಿಸಿದೆ.
ಬಿಎಚ್‌ ಸೀರೀಸ್‌ ವಾಹನಗಳಿಗೆ 15 ವರ್ಷಗಳ ಒಂದು ಅವಧಿಯ ತೆರಿಗೆ ಬದಲು ಎರಡು ವರ್ಷದ ತೆರಿಗೆ ಪಾವತಿಸಬಹುದು. ಬೇರೆ ರಾಜ್ಯಗಳಿಗೆ ವರ್ಗಾವಣೆ ಪಡೆಯುವ ಸಂದರ್ಭ ವಾಹನ ನೋಂದಣಿ ಬದಲಾಯಿಸುವ ಅಗತ್ಯವಿಲ್ಲ. ಮುಂದಿನ ಅವಧಿಯ ತೆರಿಗೆಯನ್ನು ಆ ರಾಜ್ಯಗಳಲ್ಲಿ ಪಾವತಿಸಬಹುದು. ಹೊರ ರಾಜ್ಯಗಳಲ್ಲಿ ಉದ್ಯೋಗದಲ್ಲಿರುವ ಕೇರಳೀಯರಿಗೆ ಈ ವ್ಯವಸ್ಥೆ ತುಂಬಾ ಉಪಯುಕ್ತವಾಗಿದೆ. ತೆರಿಗೆ ಹೊರೆ ಕಡಿಮೆಯಾಗಲಿದೆ.
ಕೇರಳದಲ್ಲೂ ಭಾರತ್‌ ಸೀರೀಸ್‌ ನೋಂದಣಿ ಆರಂಭಿಸುವಂತೆ ಹೈಕೋರ್ಟ್ ಮಧ್ಯಂತರ ತೀರ್ಪು ನೀಡಿದ್ದರೂ ಕೇರಳ ಸರಕಾರ ಅದನ್ನೂ ಪಾಲಿಸಿಲ್ಲ. ತೀರ್ಪು ಉಲ್ಲಂಘನೆಗಾಗಿ ಕೇರಳದ ಸಾರಿಗೆ ಕಾರ್ಯದರ್ಶಿ, ಸಾರಿಗೆ ಆಯುಕ್ತರು ಹಾಗೂ ಎರ್ನಾಕುಳಂ ಆರ್‌ಟಿಒಗೆ ನೋಟಿಸ್‌ ನೀಡಿದೆ. ಎರ್ನಾಕುಳಂ ಕಾಲಡಿಯ ಮೇರೀ ಸದನ್‌ ಪ್ರಾಜೆಕ್ಟ್ಸ್ ಪ್ರವೇಟ್‌ ಲಿಮಿಟೆಡ್‌ ನಿರ್ದೇಶಕ ಬಿ.ಬಿ. ಬೇಬಿ ನ್ಯಾಯಾಲಯ ಆದೇಶ ಉಲ್ಲಂಘನೆ ಅರ್ಜಿ ಸಲ್ಲಿಸಿದ್ದಾರೆ. ಬಿ.ಎಚ್‌. ಸೀರೀಸ್‌ ಒದಗಿಸುವಂತೆ ಕೋರಿ ಹೈಕೋರ್ಟ್ ಪರಿಗಣನೆಯಲ್ಲಿರುವ ಐದೂ ಪ್ರಕರಣಗಳಲ್ಲಿ ಆಯಾ ರಾಜ್ಯಗಳಲ್ಲಿ ನೋಂದಣಿಯಾಗುವ ವಾಹನಗಳಿಗೆ ತೆರಿಗೆ ವಿಧಿಸುವ ಅಧಿಕಾರ ಆಯಾ ರಾಜ್ಯಗಳಿಗಿದೆ. ಬಿ.ಎಚ್‌. ಸೀರೀಸ್‌ ಅನುಮತಿಸಿದರೆ ಭಾರಿ ಪ್ರಮಾಣದ ತೆರಿಗೆ ನಷ್ಟವಾಗಲಿದೆ ಎಂದು ಕೇರಳ ಸರಕಾರ ಅಫಿದವಿತ್‌ ನೀಡಿದೆ.
ಕೇರಳದಲ್ಲಿ ಭಾರತ್‌ ಸೀರೀಸ್‌ ನೋಂದಣಿಗೆ ಅವಕಾಶ ಇಲ್ಲದಿದ್ದರೂ ಹೊರ ರಾಜ್ಯಗಳಿಂದ ಬರುವ ಬಿ.ಎಚ್‌. ಸೀರೀಸ್‌ ವಾಹನಗಳಿಗೆ ಕೇರಳದಲ್ಲಿ ತಡೆ ಇಲ್ಲ. ತೆರಿಗೆ ನಷ್ಟವಾಗದ ರೀತಿಯಲ್ಲಿ ಬಿ.ಎಚ್‌. ನೋಂದಣಿಗೆ ಅವಕಾಶ ನೀಡಲು ಕೇರಳ ಸಿದ್ಧ ಎಂದು ಕೇರಳ ಅಭಿಪ್ರಾಯಪಟ್ಟಿದೆ. ಉನ್ನತ ಸಾರಿಗೆ ಸಚಿವಾಲಯ ಮತ್ತು ಸರಕಾರದ ನಡುವೆ ಪತ್ರ ವ್ಯವಹಾರಗಳನ್ನು ಹೊರತುಪಡಿಸಿದರೆ ಯಾವುದೇ ಉನ್ನತ ಮಟ್ಟದ ಚರ್ಚೆಗಳು ನಡೆದಿಲ್ಲ.
2021ರ ಆಗಸ್ಟ್‌ 28ರಂದು ಭಾರತದಲ್ಲಿ ಕೇಂದ್ರ ಸಾರಿಗೆ ಸಚಿವಾಲಯ ಬಿ.ಎಚ್‌. ರಿಜಿಸ್ಪ್ರೇಶನ್‌ ಕಾನೂನು ಜಾರಿಗೆ ತಂದಿದೆ. ಸೆಪ್ಟೆಂಬರ್‌ 15ರಂದು ಏಕೀಕೃತ ನೋಂದಣಿ ವ್ಯವಸ್ಥೆಯನ್ನು ಪರಿಚಯಿಸಿದೆ. ದೇಶದಲ್ಲಿ ಮೊದಲು ಒರಿಸ್ಸಾ ಹಾಗೂ ಬಳಿಕ ಇತರ ರಾಜ್ಯಗಳು ಏಕೀಕೃತ ನೋಂದಣಿ ವ್ಯವಸ್ಥೆ ಜಾರಿಗೆ ತಂದಿದೆ. ಕೇಂದ್ರ ಸರಕಾರದ ನೌಕರರು, ಕೇಂದ್ರ ಸಾರ್ವಜನಿಕ ವಲಯದ ಸಂಸ್ಥೆಗಳ ನೌಕರರು ನಾಲ್ಕಕ್ಕಿಂತ ಹೆಚ್ಚು ರಾಜ್ಯಗಳಲ್ಲಿ ಕಾರ‍್ಯನಿರ್ವಹಿಸುತ್ತಿರುವ ಖಾಸಗಿ ಕಂಪನಿಗಳ ಉದ್ಯೋಗಿಗಳು ಬಿಎಚ್‌ ಸೀರೀಸ್‌ ಪಡೆಯಲು ಅರ್ಹರಾಗಿರುತ್ತಾರೆ.
