ಚೆನ್ನೈ: ಚಿತ್ರರಂಗದಲ್ಲಿ ಬಾಲನಟಿಯಾಗಿ ಬೆಳೆದು ಯೌವನದಲ್ಲಿ ಚಿತ್ರರಂಗದ ಖ್ಯಾತನಾಮ ಚಿತ್ರಗಳಲ್ಲಿ ಪ್ರಮುಖ ಭೂಮಿಕೆಯಲ್ಲಿ ನಟಿಸಿ ನಂತರ ರಾಜಕಾರಣದಲ್ಲಿ ಮುಖ್ಯಮಂತ್ರಿಯಾಗಿ ಮಿಂಚಿದ ಜಯಲಲಿತಾ ಮತ್ತು ಭಾರತೀಯ ರಾಜಕಾರಣಿ, ಅವರು ಪ್ರಸ್ತುತ ಭಾರತದ ಹಣಕಾಸು ಮಂತ್ರಿಯಾಗಿ ಸೇವೆ ಸಲ್ಲಿಸುತ್ತಿರುವ ಹಿರಿಯ ರಾಜಕಾರಣಿ ನಿರ್ಮಲಾ ಸೀತಾರಾಮನ್ ಬಾಲ್ಯದ ಸ್ನೇಹಿತರು ಎಂದು ಹೇಳುವ ಫೋಟೋ ಒಂದು ಕಳೆದ ಕೆಲ ದಿನಗಳಿಂದ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿತ್ತು.
ಎಐಎಡಿಎಂಕೆ ನಾಯಕಿಯಾಗಿದ್ದ ಸೆಲ್ವಿ ಜೆ.ಜಯಲಲಿತಾ ಮತ್ತು ಬಿಜೆಪಿಯ ಹಿರಿಯ ನಾಯಕಿ ನಿರ್ಮಲಾ ಸೀತಾರಾಮನ್ ಇಬ್ಬರು ದಕ್ಷಿಣ ಭಾರತ ಮೂಲದವರಾಗಿದ್ದರಿಂದ ಈ ಅಪರೂಪದ ಫೋಟೋ ಸತ್ಯ ಎನ್ನುವಷ್ಟು ವೈರಲ್ ಆಗಿತ್ತು. ಈ ಬಗ್ಗೆ ಆಂಗ್ಲ ಸುದ್ದಿ ಸಂಸ್ಥೆ ಇಂಡಿಯಾ ಟುಡೆ ಆಯಂಟಿ ಫೇಕ್ನ್ಯೂಸ್ ವಾರ್ ರೂಮ್ ತಂಡ ಮಾಡಿರುವ ಫ್ಯಾಕ್ಟ್ಚೆಕ್ ಮೂಲಕ ಈ ಫೋಟೋದ ಹಿಂದಿರುವ ಸತ್ಯಂಶ ಬಯಲಾಗಿದೆ. ಫೋಟೋದಲ್ಲಿ ಜಯಲಲಿತಾ ಜತೆ ಇರುವುದು ನಿರ್ಮಲಾ ಸೀತಾರಾಮನ್ ಅಲ್ಲ, ಬದಲಾಗಿ ತಮಿಳಿನ ಸಾಹಿತಿ ಶಿವಶಂಕರಿ ಎಂದು ತಿಳಿದುಬಂದಿದೆ.
ಅಂದಹಾಗೆ ಜಯಲಲಿತಾ ಮತ್ತು ಶಿವಶಂಕರಿ ಒಂದು ಕಾಲದಲ್ಲಿ ಆತ್ಮೀಯ ಸ್ನೇಹಿತರು. ರವಿ ವರ್ಮಾ ಎಂಬ ಫೋಟೋಗ್ರಾಫರ್ ತಮಿಳು ಮ್ಯಾಗಜಿನ್ ಒಂದಕ್ಕೆ ತೆಗೆದ ಫೋಟೋ ಇದಾಗಿದೆ. ಫೋಟೋದ ಬಗ್ಗೆ ಗೊತ್ತಿರುವ ಒಂದಷ್ಟು ಮಂದಿ ಕಾಮೆಂಟ್ ನಲ್ಲಿ ಕೆಳಗೆ ಕ್ಲಿಕ್ಡ್ ಬೈ ಸ್ಟಿಲ್ಸ್ ರವಿ ಎಂದು ಬರೆದಿದ್ದಾರೆ.
