ಒಟ್ಟಿಗೆ ಎಸ್ಸೆಸೆಲ್ಸಿ ಪರೀಕ್ಷೆ ಬರೆದ ಅಮ್ಮ-ಮಗ: ತಾಯಿಗೆ 235 ಅಂಕ, ಪುತ್ರನಿಗೆ 562 ಅಂಕ

ಹಾಸನ: ತಾಯಿ ಮಗ ಇಬ್ಬರು ಈ ಬಾರಿಯ ಎಸ್​ಎಸ್​ಎಲ್​ಸಿ​ ಪರೀಕ್ಷೆಯನ್ನು ಒಟ್ಟಿಗೆ ಬರೆದು ಉತ್ತೀರ್ಣರಾಗಿರುವ ಅಪರೂಪ ಪ್ರಸಂಗ ಹಾಸನ ಜಿಲ್ಲೆಯ ಸಕಲೇಶಪುರ ತಾಲೂಕಿನ ಲಕ್ಷ್ಮೀಪುರ ಗ್ರಾಮದಲ್ಲಿ ನಡೆದಿದೆ.

ಲಕ್ಷ್ಮೀಪುರ ಗ್ರಾಮದ ಸಿ.ಎನ್​ ತೀರ್ಥ ಎನ್ನುವವರು ವೈಯಕ್ತಿಕ ಕಾರಣದಿಂದ ಎಂಟನೇ ತರಗತಿ ಓದುತ್ತಿರುವಾಗ ಅರ್ಧಕ್ಕೆ ಶಿಕ್ಷಣ ನಿಲ್ಲಿಸಿದ್ದರು. ಪ್ರಸಕ್ತ ವರ್ಷ ಅವರ ಮಗ ಹೇಮಂತ್ 10ನೇ ತರಗತಿಯಾಗಿದ್ದು, ವಿದ್ಯಾಭ್ಯಾಸದ ಮೇಲಿನ ಒಲವಿನಿಂದ ತೀರ್ಥ ಕೂಡ ಈ ಬಾರಿ ಮಗನೊಂದಿಗೆ ಎಸ್​ಎಸ್‌ಎಲ್​ಸಿ ಪರೀಕ್ಷೆ ಬರೆದಿದ್ದಾರೆ.

ಮಗನ ಜೊತೆ ತಾವೂ ಕೂಡ ಸತತ ಅಭ್ಯಾಸ ಮಾಡಿದ ತೀರ್ಥ ಅವರು 235 ಅಂಕ ಪಡೆದು ಪಾಸಾಗಿದ್ದಾರೆ. ಇನ್ನು ಅವರ ಮಗ ಹೇಮಂತ್​ 562 ಅಂಕ ಪಡೆದು ಉತ್ತೀರ್ಣನಾಗಿದ್ದಾನೆ.