ದಕ್ಷಿಣ ಭಾರತದ ಯಶಸ್ವಿ ನಿರ್ಮಾಪಕ ಮತ್ತು ವಿತರಕ ದಿಲ್ ರಾಜು 2ನೇ ಮದುವೆಯಾಗಿದ್ದಾರೆ. ಬಹುಕಾಲದ ಗೆಳತಿ ತೇಜಸ್ವಿಯವರನ್ನು 49 ವರ್ಷದ ದಿಲ್ ರಾಜು ನಿಜಾಮಾಬಾದ್ ದೇವಸ್ಥಾನದಲ್ಲಿ ವಿವಾಹವಾಗಿದ್ದಾರೆ.
ದಿಲ್ ರಾಜು ಅವರ ಪತ್ನಿ ಅನಿತಾ 2017 ರಲ್ಲಿ ಅನಾರೋಗ್ಯದಿಂದ ನಿಧನರಾಗಿದ್ದರು. ಆ ಬಳಿಕ ಒಬ್ಬಳೇ ಮಗಳಿಗೆ ವಿವಾಹ ಮಾಡಿಕೊಟ್ಟರು. ಮಗಳನ್ನು ಗಂಡನ ಮನೆಗೆ ಕಳುಹಿಸಿಕೊಟ್ಟ ನಂತರ ದಿಲ್ ರಾಜು ಏಕಾಂಗಿಯಾಗಿ ಜೀವನ ನಡೆಸುತ್ತಿದ್ದರು. ಇದೀಗ ತೇಜಸ್ವಿ ಎಂಬವರ ಜೊತೆಗೆ ದಿಲ್ ರಾಜು ಎರಡನೇ ವಿವಾಹವಾಗಿದ್ದಾರೆ.
ಟಾಲಿವುಡ್ನಲ್ಲಿ ಸಕ್ಸಸ್ಫುಲ್ ನಿರ್ಮಾಪಕ ಎಂದು ಹೆಸರು ಮಾಡಿದ್ದ ದಿಲ್ ರಾಜು ತಮ್ಮ ಶ್ರೀ ವೆಂಕಟೇಶ್ವರ ಕ್ರಿಯೇಷನ್ ಮೂಲಕ ಅನೇಕ ಯಶಸ್ವಿ ಸಿನಿಮಾಗಳನ್ನು ತೆರೆಗೆ ತಂದಿದ್ದಾರೆ. ಮಾತ್ರವಲ್ಲದೆ ಸಿನಿಮಾವೊಂದಕ್ಕೆ‘ ರಾಷ್ಟ್ರ ಪ್ರಶಸ್ತಿಯನ್ನು ಪಡೆದುಕೊಂಡಿದ್ದಾರೆ.
2003ರಲ್ಲಿ ದಿಲ್ ಸಿನಿಮಾದ ಮೂಲಕ ನಿರ್ಮಾಪಕರಾಗಿ ಪ್ರಯಾಣ ಆರಂಭಿಸಿದರು. ಆನಂತರ ಆರ್ಯ, ಬೊಮ್ಮರಿಲ್ಲು, ಮಿಸ್ಟರ್ ಪರ್ಫೆಕ್ಟ್, ಸೀತಮ್ಮ ವಾಕಿಟ್ಲೋ ಸಿರಿಮಲ್ಲೆ ಚೆಟ್ಟು ಮುಂತಾದ ಹಿಟ್ ಸಿನಿಮಾಗಳನ್ನು ದಿಲ್ ರಾಜು ನಿರ್ಮಿಸಿದರು.
ಸದ್ಯ ದಿಲ್ರಾಜು ನಿರ್ಮಿಸಿದ ಜಾನು ಸಿನಿಮಾ ಬಿಡುಗಡೆಯಾಗಿದೆ. ಇದರ ಜೊತೆಗೆ ನಾನಿ ಅಭಿನಯದ ವಿ, ಅಲ್ಲು ಅರ್ಜುನ್ ನಟನೆಯ ಐಕಾನ್ ಸಿನಿಮಾವನ್ನು ದಿಲ್ ರಾಜ್ ನಿರ್ಮಿಸುತ್ತಿದ್ದಾರೆ.
