ಜೈಪುರ: ಯುವ ದಂಪತಿಯನ್ನು ಬಂಧಿಸಿ ನೂರಾರು ಜನರ ಎದುರಲ್ಲಿಯೇ ಬೆತ್ತಲೆಯಾಗಿ ಸ್ನಾನ ಮಾಡಿಸಿದ ಅಮಾನವೀಯ ಘಟನೆ ರಾಜಸ್ಥಾನದ ಸಿಕಾರ್ ಜಿಲ್ಲೆಯಲ್ಲಿ ನಡೆದಿದೆ.
ವಾಸ್ತವ ಕಾಪ್ ಪಂಚಾಯ್ತಿಯ ಪಂಚ-ಪಟೇಲರು ಯುವ ದಂಪತಿಯನ್ನು ಶುದ್ಧೀಕರಿಸುವ ಸಲುವಾಗಿ ಈ ಅಮಾನವೀಯ ಶಿಕ್ಷೆ ವಿಧಿಸಿದ್ದಾರೆ. ಇದೇ ವೇಳೆ ಅವರಿಗೆ ರೂ. 53 ಸಾವಿರ ದಂಡ ವಿಧಿಸಿದ್ದಾರೆ.
ಅಕ್ರಮ ಸಂಬಂಧದ ಪಾಪಕ್ಕೆ ಪ್ರಾಯಶ್ಚಿತ್ತ ಎಂದು ನೂರಾರು ಜನರ ಮುಂದೆ ದಂಪತಿಯಿಂದ ನಗ್ನ ಸ್ನಾನ ಮಾಡಿಸಲಾಗಿದೆ. ಸಾನ್ಸಿ ಅಭಿವೃದ್ಧಿ ಮಂಡಳಿಯ ಕೆಲವು ಸದಸ್ಯರು ಸಿಕಾರ್ ಜಿಲ್ಲಾ ಪೊಲೀಸ್ ಆಡಳಿತಕ್ಕೆ ಜ್ಞಾಪಕ ಪತ್ರ ಸಲ್ಲಿಸಿದಾಗ ಈ ವಿಷಯ ಬೆಳಕಿಗೆ ಬಂದಿತು.
ಈ ದಂಪತಿಗಳು ಸಿಕಾರ್‌ನ ಸೋಲಾ ಗ್ರಾಮಕ್ಕೆ ಸೇರಿದವರಾಗಿದ್ದು, ಒಬ್ಬರಿಗೊಬ್ಬರು ಚಿಕ್ಕಮ್ಮ ಮತ್ತು ಸೋದರಳಿಯರಾಗಿ ಸಂಬಂಧ ಹೊಂದಿದ್ದಾರೆಂದು ಆರೋಪಿಸಲಾಗಿದೆ. ಕೆಲವು ವಾರಗಳ ಹಿಂದೆ, ದಂಪತಿಗಳ ಆಕ್ಷೇಪಾರ್ಹ ವೀಡಿಯೊವನ್ನು ರಹಸ್ಯವಾಗಿ ಮಾಡಿ ಸಾಮಾಜಿಕ ಜಾಲತಾಣಕ್ಕೆ ಹರಿಬಿಡಲಾಗಿತ್ತು ನಂತರ ವಿಡಿಯೋ ವೈರಲ್ ಆಗಿತ್ತು.
ಈ ಸಂಬಂಧ ಆಗಸ್ಟ್ 21ರಂದು, ಗ್ರಾಮ ಜಾತಿ ಮಂಡಳಿಯ ಸದಸ್ಯರು ಪುರುಷನ ಕುಟುಂಬ ರೂ. 31,000 ಮತ್ತು ಮಹಿಳೆಯ ಕಡೆಯವರಿಗೆ 22,000 ರೂ. ದಂಡವನ್ನು ವಿಧಿಸಿದ್ದು ಹಣ ಜಮಾ ಮಾಡಿದ ನಂತರ ನಗ್ನ ಸ್ನಾನ ಮಾಡಿಸಲಾಗಿದೆ. ಇನ್ನು ದಂಡದ ಹಣವನ್ನು ಕಾಪ್ ಸದಸ್ಯರು ಹಂಚಿಕೊಂಡಿದ್ದಾರೆ. ಸಾನ್ಸಿ ಅಭಿವೃದ್ಧಿ ಮಂಡಳಿ ನೀಡಿದ ದೂರಿನ ಆಧಾರದ ಮೇಲೆ ಸಿಕಾರ್ ಪೊಲೀಸರು ಈಗ 9 ಜನರ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ. ಸಿಕಾರ್ ಎಸ್ ಪಿ ದೇವೇಂದ್ರ ಶರ್ಮಾ ಅವರ ಪ್ರಕಾರ, ಅವರ ಕುಟುಂಬಗಳ ಒಪ್ಪಿಗೆಯೊಂದಿಗೆ ಯುವ ದಂಪತಿಗೆ ನಗ್ನವಾಗಿ ಸ್ನಾನ ಮಾಡಿಸಲಾಗಿದೆ ಎಂದು ಹೇಳಿದ್ದಾರೆ.
