ಮಹಾರಾಷ್ಟ್ರದ ವಸತಿ ಸಚಿವರಿಗೂ ಕೊರೋನಾ ಸೋಂಕು ಇರುವುದು ದೃಢ

ಮುಂಬೈ: ಮಹಾರಾಷ್ಟ್ರದ ವಸತಿ ಸಚಿವ ಮತ್ತು ಮುಂಬ್ರಾ ಕ್ಷೇತ್ರದ ಶಾಸಕ ಜಿತೇಂದ್ರ ಅವದ್ ಅವರಿಗೆ ಕರೊನಾ ಸೋಂಕು ಇರುವುದು ಇಂದು ನಡೆದ ತಪಾಸಣೆಯಲ್ಲಿ ದೃಢವಾಗಿದೆ. ಕರೊನಾ ಸೋಂಕಿತರ ಸಂಪರ್ಕಕ್ಕೆ ಹೋಗಿದ್ದ ಅವರು ಏ.13ರಿಂದಲೂ ಸೆಲ್ಫ್​ ಕ್ವಾರಂಟೈನ್​ನಲ್ಲಿ ಇದ್ದರು. ನಿನ್ನೆ ತಪಾಸಣೆ ನಡೆಸಿದಾಗ ಕರೊನಾ ನೆಗೆಟಿವ್ ಎಂದು ವರದಿ ಬಂದಿತ್ತು.

ಆದರೂ ಕ್ವಾರಂಟೈನ್​ ಅವಧಿ ಮುಗಿಸುತ್ತೇನೆ ಎಂದಿದ್ದ ಜಿತೇಂದ್ರ ಅವರಿಗೆ ಇಂದು ಸೋಂಕು ದೃಢಪಟ್ಟಿದೆ. ಸ್ವಲ್ಪ ದಿನಗಳ ಹಿಂದೆ ಜಿತೇಂದ್ರ ಅವರ ಮನೆಯ ಹೌಸ್​ಕೀಪಿಂಗ್​ ಕೆಲಸಗಾರರು, ಐವರು ಭದ್ರತಾ ಸಿಬ್ಬಂದಿಯಲ್ಲಿ ಕರೊನಾ ವೈರಸ್​ ದೃಢಪಟ್ಟಿತ್ತು.

ತಮ್ಮ ನೇರ ಸಂಪರ್ಕದಲ್ಲಿದ್ದ ಸುಮಾರು 14 ಮಂದಿಯಲ್ಲಿ ಕರೊನಾ ಸೋಂಕು ಕಾಣಿಸಿಕೊಂಡ ಬಳಿಕ, ಸಚಿವರೂ ಸೆಲ್ಫ್​ ಕ್ವಾರಂಟೈನ್​ಗೆ ಒಳಗಾಗಿದ್ದರು. ಅನೇಕ ದಿನಗಳಿಂದ ಜಿತೇಂದ್ರ ಅವದ್​ ಅವರು ಯಾರ ಸಂಪರ್ಕಕ್ಕೂ ಹೋಗಿಲ್ಲದ ಕಾರಣ ಉಳಿದ ಅವರ ಸಹದ್ಯೋಗಿಗಳಿಗೆ ಸೋಂಕು ತಗುಲುವ ಅಪಾಯ ಕಡಿಮೆ ಎನ್ನಲಾಗಿದೆ.