ಉಡುಪಿ: ಮಹಿಳೆಯರ ವಿವಾಹ ವಯಸ್ಸನ್ನು 21 ವರ್ಷಕ್ಕೆ ಏರಿಸುವುದು ಅತ್ಯಗತ್ಯ. ಮಹಿಳೆಯರ ಸಬಲೀಕರಣಕ್ಕಾಗಿ ಕೇಂದ್ರ ಸರ್ಕಾರ ಈ ಬದಲಾವಣೆಯನ್ನು ತಂದಿದೆ ಎಂದು ರಾಷ್ಟ್ರೀಯ ಮಹಿಳಾ ಆಯೋಗದ ಸದಸ್ಯೆ ಶ್ಯಾಮಲಾ ಕುಂದರ್ ಹೇಳಿದರು.
“ಪ್ರಧಾನಿ ನರೇಂದ್ರ ಮೋದಿ ಅವರು ಮಹಿಳೆಯರಿಗೆ ಶಿಕ್ಷಣ ನೀಡಲು ‘ಬೇಟಿ ಬಚಾವೋ ಬೇಟಿ ಪಡಾವೋ’ ಕಾರ್ಯಕ್ರಮವನ್ನು ಪರಿಚಯಿಸಿದ್ದಾರೆ. ಆದರೆ, ಬಹುತೇಕ ಕಡೆ 18ನೇ ವಯಸ್ಸಿಗೆ ಹುಡುಗಿಗೆ ಮದುವೆ ಮಾಡಿಸಿ ಆಕೆಯ ಶಿಕ್ಷಣ ನಿಲ್ಲಿಸಲಾಗುತ್ತದೆ ಎಂದರು.
ಮಹಿಳೆಯರು ತಮ್ಮ ಪದವಿಗಳನ್ನು ಪಡೆಯಲು ಸಾಧ್ಯವಾಗದ ಹಲವಾರು ನಿದರ್ಶನಗಳಿವೆ, ಕೆಲವೊಂದು ಬಾರಿ ಪೋಷಕರ ಒತ್ತಡದಲ್ಲಿ ಮದುವೆಯಾಗುತ್ತಾರೆ. 18 ವರ್ಷಕ್ಕೆ ಹುಡುಗಿ ಮದುವೆಗೆ ಮಾನಸಿಕವಾಗಿ ಸಿದ್ಧಳಾಗುವುದಿಲ್ಲ. ಹಾಗಾಗಿ ಮದುವೆಯ ವಯಸ್ಸನ್ನು 21 ವರ್ಷಕ್ಕೆ ಹೆಚ್ಚಿಸುವಂತೆ ರಾಷ್ಟ್ರೀಯ ಮಹಿಳಾ ಆಯೋಗ ಸರ್ಕಾರಕ್ಕೆ ಸೂಚಿಸಿದೆ.
“ಕಾಲೇಜು ದಿನಗಳಲ್ಲಿ ಹುಡುಗಿಗೆ ಮದುವೆ ಮಾಡಿಸಿದರೆ ಅದು ಅವಳ ಮಾನಸಿಕ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ ಎಂಬುದು ವರದಿಗಳ ಮೂಲಕ ಸಾಬೀತಾಗಿದೆ. ಭಾರತದಲ್ಲಿ, 1,00,000 ನವಜಾತ ಶಿಶುಗಳಲ್ಲಿ 113 ಶಿಶುಗಳು 30 ದಿನಗಳ ಮೊದಲು ಸಾಯುತ್ತವೆ. ಇದರ ಹಿಂದಿನ ಕಾರಣವೆಂದರೆ ಅನೇಕ ಸಂದರ್ಭಗಳಲ್ಲಿ ತಾಯಂದಿರು ತುಂಬಾ ಚಿಕ್ಕವರು. ಹಾಗಾಗಿ ಬಾಲ್ಯವಿವಾಹವನ್ನು ಸಂಪೂರ್ಣವಾಗಿ ತಡೆಗಟ್ಟಲು ಈ ಮಸೂದೆಯನ್ನು ಮಂಡಿಸುವುದು ಅತ್ಯಗತ್ಯ ಎಂದು ಅವರು ಹೇಳಿದರು.
