ಪಾಟ್ನಾ: ಕೆಲವರು ಯಾವೆಲ್ಲಾ ರೂಪದಲ್ಲಿ ಸೇಡು ತೀರಿಸಿಕೊಳ್ತಾರೆ ಅಂತಾ ಹೇಳೋದಕ್ಕೆ ಸಾಧ್ಯಾನೇ ಇಲ್ಲ. ಇಲ್ಲೊಬ್ಬಳು ಯುವತಿ ತನ್ನ ಪ್ರಿಯಕರ ಬೇರೆ ಯುವತಿ ಜೊತೆ ಮದುವೆ ಆಗಿದ್ದಕ್ಕೆ ಕೋಪಗೊಂಡು ಆತನ ಪತ್ನಿಯ ಕೂದಲು ಕತ್ತರಿಸಿ, ಮುಖಕ್ಕೆ ಫೆವಿಕ್ವಿಕ್ ಹಚ್ಚಿದ್ದಾಳೆ.
ಇಂತಹದ್ದೊಂದು ವಿಚಿತ್ರ ಘಟನೆ ನಡೆದಿರೋದು ಬಿಹಾರದ ನಳಂದಾದ ಮೋರಾ ತಾಲಾಬ್ ಗ್ರಾಮದಲ್ಲಿ. ಡಿಸೆಂಬರ್ 1ರಂದು ಗೋಪಾಲ್ ರಾಮ್ ಮದುವೆ ನಡೆದಿತ್ತು. ಮದುವೆಗೂ ಮುನ್ನ ಗೋಪಾಲ್ ಬೇರೆ ಯುವತಿಯನ್ನ ಪ್ರೀತಿಸುತ್ತಿದ್ದನು. ಆದ್ರೆ ಆಕೆಗೆ ಕೈ ಕೊಟ್ಟಿದ್ದ ಗೋಪಾಲ್ ಕುಟುಂಬಸ್ಥರ ಇಚ್ಛೆಯಂತೆ ಮದುವೆ ಆಗಿದ್ದನು. ಇದರಿಂದ ಗೋಪಾಲ್ ಗೆಳತಿ ಕೋಪಗೊಂಡಿದ್ದಳು.
ಡಿಸೆಂಬರ್ 1ರ ರಾತ್ರಿ ಮದುವೆ ಮನೆಗೆ ಯುವತಿ ಎಂಟ್ರಿ ಕೊಟ್ಟಿದ್ದಳು. ಎರಡು ದಿನ ಮದುವೆ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದ ಕುಟುಂಬಸ್ಥರು ಗಾಢ ನಿದ್ರೆಗೆ ಜಾರಿದ್ದರು. ವಧು ಕುಳಿತಿದ್ದ ಕೋಣೆಗೆ ಎಂಟ್ರಿ ಕೊಟ್ಟ ಯುವತಿ ಮೊದಲಿಗೆ ಕೂದಲು ಕತ್ತರಿಸಿದ್ದಾಳೆ. ನಂತ್ರ ಆಕೆಯ ಕಣ್ಣು ಸೇರಿದಂತೆ ಮುಖಕ್ಕೆ ಫೆವಿಕ್ವಿಕ್ ಹಚ್ಚಿದ್ದಾಳೆ. ಕಣ್ಣಿಗೆ ಫೆವಿಕ್ವಿಕ್ ಬೀಳುತ್ತಿದ್ದಂತೆ ಎಚ್ಚರಗೊಂಡ ವಧು ನೋವಿನಿಂದ ಕಿರುಚಿದ್ದಾಳೆ. ವಧುವಿನ ಧ್ವನಿ ಕೇಳುತ್ತಿದ್ದಂತೆ ಬಂದ ಮನೆಯವರು ಯುವತಿಯನ್ನ ಹಿಡಿದಿದ್ದಾರೆ.
ಸೊಸೆಯ ಜೋರಾಗಿ ಸಹಾಯಕ್ಕೆ ಕೂಗುತ್ತಿದ್ದಂತೆ ನಾನು ಆಕೆಯ ಕೋಣೆಗೆ ಬಂದೆ. ಅಷ್ಟರಲ್ಲಿಯೇ ಆ ಯುವತಿ ಕೂದಲು ಕತ್ತರಿಸಿ, ಫೆವಿಕ್ವಿಕ್ ಹಚ್ಚಿದ್ದಳು. ಫೆವಿಕ್ವಿಕ್ ಕಣ್ಣಿನೊಳಗೆ ಹೋಗಿದ್ದರಿಂದ ಸೊಸೆ ಅಳುತ್ತಿದ್ದಳು. ಕೂಡಲೇ ಆಕೆಯನ್ನ ಆಸ್ಪತ್ರೆಗೆ ದಾಖಲಿಸಿದ್ದೇವೆ ಎಂದು ಗೋಪಾಲ್ ತಾಯಿ ಉಮಾದೇವಿ ಹೇಳಿದ್ದಾರೆ. ಎರಡು ದಿನಗಳಿಂದು ಮದುವೆಯಲ್ಲಿ ಭಾಗಿಯಾಗಿದ್ದರಿಂದ ನಾನು ನಿದ್ದೆಗೆ ಜಾರಿದ್ದೆ. ಅಷ್ಟರಲ್ಲೇ ಕೋಣೆಗೆ ನುಗ್ಗಿ ಪತ್ನಿಯ ಕೂದಲು ಕತ್ತರಿಸಿದ್ದಾಳೆ ಎಂದು ಗೋಪಾಲ್ ಹೇಳಿದ್ದಾನೆ.
