ಮಂಗಳೂರು : ಚಂದನವನದ ಡ್ರಗ್ಸ್ ದಂಧೆಯ ತನಿಖೆ ಇದೀಗ ಕಡಲ ತೀರಕ್ಕೂ ತಲುಪಿದೆ. ಮಂಗಳೂರು ಪೊಲೀಸರು ಕೂಡಾ ಈ ಬಗ್ಗೆ ತನಿಖೆ ನಡೆಸುತ್ತಿದ್ದಾರೆ. ಡ್ಯಾನ್ಸರ್ ಕಿಶೋರ್ ಶೆಟ್ಟಿ, ಅಕೀಲ್ ನೌಶೀಲ್, ತರುಣ್ ರಾಜ್, ಮಣಿಪುರದ ಅಸ್ಕಾ, ಮುಹಮ್ಮದ್ ಶಾಕೀರ್, ಶಾನ್ ನವಾಜ್ ಹಾಗೂ ನೈಜೀರಿಯಾ ಪ್ರಜೆ ಸೇರಿದಂತೆ ಒಟ್ಟು 8 ಮಂದಿಯನ್ನು ಮಂಗಳೂರು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ.
ಈ ನಡುವೆ ಕಿಶೋರ್ ಶೆಟ್ಟಿಯ ಗರ್ಲ್ ಫ್ರೆಂಡ್ ಅಸ್ಕಾ ಮಹತ್ವದ ಮಾಹಿತಿಗಳನ್ನು ಬಾಯಿ ಬಿಟ್ಟಿದ್ದು, ಅನುಶ್ರೀಯನ್ನು ಒಂದ್ಸಲ ಪಾರ್ಟಿಯಲ್ಲಿ ನೋಡಿರುವುದಾಗಿ ಹೇಳಿಕೆ ಕೊಟ್ಟಿದ್ದಾಳಂತೆ. ಹೀಗಾಗಿ ಈ ಹೇಳಿಕೆ ಅನುಶ್ರೀಗೆ ಸಂಕಷ್ಟ ತಂದೊಡ್ಡುವ ಸಾಧ್ಯತೆಗಳಿದೆ. ಯಾಕಂದ್ರೆ ಅನುಶ್ರೀ ನಾನು ಪಾರ್ಟಿಗೆ ಹೋಗಿಯೇ ಇಲ್ಲ ಅಂದಿದ್ದರು.
ಮಣಿಪುರ ಮೂಲದ ಆಸ್ಕಾ ಹಲವು ವರ್ಷಗಳ ಹಿಂದೆಯೇ ಬೆಂಗಳೂರಿನಲ್ಲಿ ಬಂದು ನೆಲೆಸಿದ್ದಳು. ಆ ಬಳಿಕ ಕೆಲ ವರ್ಷಗಳಿಂದ ಮಂಗಳೂರಿನಲ್ಲಿ ವಾಸವಿದ್ದಳು. ಹಗಲು ವೇಳೆ ಸ್ಪಾ ಒಂದರಲ್ಲಿ ಕೆಲಸ ಮಾಡುತ್ತಿದ್ದ ಆಸ್ಕಾ, ರಾತ್ರಿ ಮಂಗಳೂರಿನ ಪಬ್ಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಳು. ಕಿಶೋರ್ ಶೆಟ್ಟಿಯ ಪರಿಚಯವಾದ ಬಳಿಕ ಡ್ರಗ್ಸ್ ಪಾರ್ಟಿಗಳಿಗೆ ಪ್ರವೇಶ ನೀಡುತ್ತಿದ್ದಳು ಎನ್ನಲಾಗಿದೆ. ಡ್ರಗ್ ಟೆಸ್ಟ್ ಮಾಡಿಸಿದಾಗಲೂ ಪಾಸಿಟಿವ್ ಬಂದಿತ್ತು ಎಂದು ತಿಳಿದುಬಂದಿದೆ.
ಇನ್ನು ತನಿಖೆ ವೇಳೆ ಅನುಶ್ರೀ ಯನ್ನು ಒಮ್ಮೆ ನೋಡಿದ್ದೆನೆ ಎಂದು ಆಸ್ಕಾ ಸಿಸಿಬಿ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾಳೆ. ಅಲ್ಲದೆ ಬಾಲಿವುಡ್ ನ ನಟನೊಂದಿಗೆ ಗೋವಾ ಹಾಗೂ ಮುಂಬೈಗಳಲ್ಲಿ ಪಾರ್ಟಿ ಕೂಡ ಮಾಡಿದ್ದೆ ಎಂದು ಮಾಹಿತಿ ನೀಡಿದ್ದಾಳೆ ಎಂದು ಹೇಳಲಾಗಿದೆ.