ಕೊಲ್ಲಂ: ‘ಕೊರೊನಾ’ ಇಡೀ ಜಗತ್ತಿನಲ್ಲಿ ಲಕ್ಷಾಂತರ ಜನರನ್ನು ಬಲಿ ಪಡೆದು, ಭಯಭೀತಿ ಮೂಡಿಸಿದ್ದರೆ, ಇಲ್ಲೊಬ್ಬರು ‘ಕೊರೊನಾ’ ನನಗೇ ವೋಟು ಹಾಕಿ, ನಿಮ್ಮ ಸೇವೆ ಮಾಡುತ್ತೇನೆ ಎಂದು ಪ್ರೀತಿಯಿಂದ ಕೇಳಿಕೊಳ್ಳುತ್ತಿದ್ದಾರೆ. ಹೌದು, ಕೇರಳದ ಕೊಲ್ಲಂ ಕಾರ್ಪೊರೇಶನ್ ನ ಮದಿಲಿಲ್ ವಿಭಾಗದ ಬಿಜೆಪಿ ಅಭ್ಯರ್ಥಿಯಾಗಿ 24ರ ಹರೆಯದ ಕೊರೊನಾ ಥಾಮಸ್ ಚುನಾವಣಾ ಕಣಕ್ಕಿಳಿದಿದ್ದಾರೆ.
24 ವರ್ಷದ ಕೊರೊನಾ ಥಾಮಸ್ಗೆ ಅವರ ಹೆಸರು ಈ ವರ್ಷ ತುಂಬಾನೇ ಪ್ರಸಿದ್ಧಿ ತಂದುಕೊಟ್ಟಿದೆಯಂತೆ. ಇಷ್ಟು ವರ್ಷ ನನ್ನ ಹೆಸರಿನ ಬಗ್ಗೆ ನನಗೆ ಏನೂ ಅನ್ನಿಸ್ತಾ ಇರಲಿಲ್ಲ. ಆದರೆ ಇದೀಗ ಎಲ್ಲೆಡೆ ಕೊರೊನಾ ವೈರಸ್ನದ್ದೇ ಚರ್ಚೆ ಬಳಿಕ ನನ್ನ ಹೆಸರೇ ನನಗೆ ವಿಚಿತ್ರ ಎನಿಸೋಕೆ ಶುರುವಾಗಿದೆ ಅಂತಾರೆ ಕೊರೊನಾ ಥಾಮಸ್.
ಕೊರೊನಾರ ತಂದೆ ಮೂಲತಃ ಕಲಾವಿದರಂತೆ. ತಮ್ಮ ಅವಳಿ ಮಕ್ಕಳಿಗೆ ವಿಶೇಷವಾದ ಹೆಸರನ್ನಿಡಬೇಕು ಎಂದು ನಿರ್ಧರಿಸಿದ ಅವರು, ಹೆಣ್ಣು ಮಗುವಿಗೆ ಕೊರೊನಾ ಹಾಗೂ ಗಂಡು ಮಗುವಿಗೆ ಕೋರಲ್ ಎಂದು ನಾಮಕರಣ ಮಾಡಿದ್ದರಂತೆ.
ಅಂದಹಾಗೆ ಬಿಜೆಪಿ ಅಭ್ಯರ್ಥಿ ‘ಕೊರೊನಾ’ ಗರ್ಭಿಣಿಯಾಗಿದ್ದಾಗ ಕೊರೊನಾ ಸೋಂಕು ದೃಢವಾಗಿದ್ದರಿಂದಲೂ ಕೆಲ ದಿನಗಳ ಹಿಂದಷ್ಟೇ ಸುದ್ದಿಯಾಗಿದ್ದರು. ಆದರೆ ಕೊರೊನಾ ವಿರುದ್ಧ ಜಯಿಸಿರುವ ಕೊರೊನಾ ಥಾಮಸ್ ಮಗು ಕೂಡ ಆರೋಗ್ಯವಾಗಿದೆ. ಕೊರೊನಾ ಪತಿ ಕೂಡ ಬಿಜೆಪಿ ಸದಸ್ಯರಾಗಿದ್ದು ಕೊರೊನಾ ರಾಜಕೀಯ ಹಾದಿ ತುಳಿಯಲು ಅವರೇ ಸ್ಪೂರ್ತಿಯಾಗಿದ್ದಾರೆ.
ಕೇರಳದಲ್ಲಿ ಪಂಚಾಯತಿ ಚುನಾವಣೆ ಕಾವು ಹೆಚ್ಚಾಗಿದೆ. ಡಿಸೆಂಬರ್ 8 ರಿಂದ 14ರವರೆಗೆ ಮೂರು ಹಂತದಲ್ಲಿ ಸ್ಥಳೀಯಾಡಳಿತ ಸಂಸ್ಥೆಗಳ ಚುನಾವಣೆ ನಡೆಯಲಿದೆ.
