ಕುಂದಾಪುರ: ಪತಿ ಹಾಗೂ ಆತನ ಮನೆಯವರ ನಿರಂತರ ಮಾನಸಿಕ ಕಿರುಕುಳ ಮತ್ತು ಉದ್ಧಟತನದ ನಡವಳಿಕೆಯಿಂದ ಮನನೊಂದ ಯುವತಿಯೊಬ್ಬರು ತವರು ಮನೆಯಲ್ಲಿ ಫಿನೈಲ್ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿರುವ ದಾರುಣ ಘಟನೆ ಕುಂದಾಪುರ ತಾಲೂಕಿನ ಆಲೂರಿನಲ್ಲಿ ನಡೆದಿದೆ.ಸಂತ್ರಸ್ತೆಯನ್ನು ಜಯಶ್ರೀ ಎಂದು ಗುರುತಿಸಲಾಗಿದ್ದು, ಇವರು ಪ್ರಸ್ತುತ ಕುಂದಾಪುರದ ಖಾಸಗಿ ಆಸ್ಪತ್ರೆಯಲ್ಲಿ ಒಳರೋಗಿಯಾಗಿ ದಾಖಲಾಗಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಘಟನೆಯ ಹಿನ್ನೆಲೆ: ಜಯಶ್ರೀ ಅವರು 2024ರ ನವೆಂಬರ್ 17ರಂದು ಅಮಾಸೆಬೈಲು ತಪ್ಲು ನಿವಾಸಿ ಪ್ರಕಾಶ್ ಆಚಾರ್ಯ ಎಂಬವರೊಂದಿಗೆ ಹಿಂದೂ ಸಂಪ್ರದಾಯದಂತೆ ವಿವಾಹವಾಗಿದ್ದರು. ಮದುವೆಯ ನಂತರ ಗಂಡನ ಮನೆಯಲ್ಲಿದ್ದಾಗ, ಪತಿಯ ಅಣ್ಣ ಹಾಗೂ ತಂಗಿ “ನಿನಗೆ ಮಕ್ಕಳಾದರೆ ಪ್ರಕಾಶ್ ನಮ್ಮನ್ನು ಮತ್ತು ನಮ್ಮ ಮಕ್ಕಳನ್ನು ನೋಡಿಕೊಳ್ಳುವುದಿಲ್ಲ” ಎಂದು ಪದೇ ಪದೇ ಕಿರುಕುಳ ನೀಡುತ್ತಿದ್ದರು. ಅಲ್ಲದೆ, ಜಯಶ್ರೀ ತವರು ಮನೆಗೆ ಫೋನ್ ಮಾಡಿದಾಗ ಮೊಬೈಲ್ ಕಸಿದುಕೊಂಡು ಪರಿಶೀಲಿಸಿ ಬೆದರಿಕೆ ಹಾಕುತ್ತಿದ್ದರೆನ್ನಲಾಗಿದೆ.ಕಳೆದ 2025ರ ಡಿಸೆಂಬರ್‌ನಲ್ಲಿ ಜಯಶ್ರೀ ಗಂಡು ಮಗುವಿಗೆ ಜನ್ಮ ನೀಡಿದ್ದರು. ಮಗು ಜನಿಸಿದ ಬಳಿಕ ಕಳೆದ 6 ತಿಂಗಳುಗಳಿಂದ ಪತಿ ಪ್ರಕಾಶ್ ಆಚಾರ್ಯ ತವರು ಮನೆಗೆ ಬಾರದೆ ನಿರ್ಲಕ್ಷಿಸಿದ್ದರು.
ಸಂಸಾರದ ಗೊಂದಲಗಳನ್ನು ಬಗೆಹರಿಸಿಕೊಳ್ಳಲು ಅಕ್ಟೋಬರ್ 11, 2026ರಂದು ಎರಡೂ ಕುಟುಂಬಸ್ಥರು ಸೇರಿ ಮಾತುಕತೆ ನಡೆಸಿದ್ದರು. ಈ ವೇಳೆ ಪತಿ ಪ್ರಕಾಶ್ ಆಚಾರ್ಯ, “ನಿನ್ನ ಜೊತೆ ಸಂಸಾರ ಮಾಡಲು ಸಾಧ್ಯವಿಲ್ಲ. ನೀನು ಮತ್ತು ನಿನ್ನ ಮಗು ಎಲ್ಲಿ ಬೇಕಾದರೂ ಹೋಗಿ ಸಾಯಿರಿ” ಎಂದು ಉದ್ಧಟತನದಿಂದ ಮಾತನಾಡಿ ತೀವ್ರ ಮಾನಸಿಕ ಹಿಂಸೆ ನೀಡಿದ್ದಾನೆ ಎಂದು ಆರೋಪಿಸಲಾಗಿದೆ.
ಪತಿಯ ಈ ಅಮಾನवीय ಮಾತುಗಳಿಂದ ತೀವ್ರ ಮನನೊಂದ ಜಯಶ್ರೀ ಅವರು ಅಂದೇ (ಅಕ್ಟೋಬರ್ 11) ಆಲೂರಿನಲ್ಲಿರುವ ತಮ್ಮ ತವರು ಮನೆಯಲ್ಲಿ ಫಿನೈಲ್ ಸೇವಿಸಿ ಅಸ್ವಸ್ಥಗೊಂಡಿದ್ದಾರೆ. ತಕ್ಷಣ ಎಚ್ಚೆತ್ತ ಕುಟುಂಬಸ್ಥರು ಅವರನ್ನು ಆಸ್ಪತ್ರೆಗೆ ದಾಖಲಿಸಿ ಪ್ರಾಣಾಪಾಯದಿಂದ ಪಾರು ಮಾಡಿದ್ದಾರೆ.
ಈ ಕುರಿತು ಸಂತ್ರಸ್ತೆ ಜಯಶ್ರೀ ಅವರು ನೀಡಿದ ದೂರಿನ ಮೇರೆಗೆ ಗಂಗೊಳ್ಳಿ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 47/2026 ರಡಿ, ಬಿಎನ್‌ಎಸ್ (BNS) ಕಾಯ್ದೆಯ ಕಲಂ 85, 352, 351 ಹಾಗೂ 3(5) ರ ಅಡಿಯಲ್ಲಿ ಪತಿ ಸೇರಿದಂತೆ ಇತರರ ವಿರುದ್ಧ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.
