ಬೆಂಗಳೂರು: ಕೆಲವರು ತಮಗೆ ಬೇಕಾದ ವಸ್ತುವನ್ನು ಪಡೆಯಲು ಏನೆಲ್ಲಾ ಸರ್ಕಸ್ ಮಾಡ್ತಾರೆ ಅನ್ನೋದನ್ನು ನೋಡಿರ್ತೀವಿ. ಆದರೆ ಇಲ್ಲೊಬ್ಬ ಆಸಾಮಿ ಮೊಬೈಲ್ ಫೋನ್ ಗಾಗಿ ಎಂತಹ ನಿರ್ಧಾರ ತೆಗದುಕೊಂಡಿದ್ದಾನೆ ಗೊತ್ತಾ? ಕೊನೆಗೆ ಅದಕ್ಕೆ ತಕ್ಕ ಪ್ರತಿಫಲ ಕೂಡ ಪಡೆದಿದ್ದಾನೆ.
ಎಂಐ ಫೋನುಗಳ ಅಭಿಮಾನಿಯಾಗಿರುವ ಕಮಲ್ ಅಹಮದ್ ಹೆಸರಿನ ಯುವಕ, ಡಿಸೆಂಬರ್ 11ರಂದು ಟ್ವಿಟ್ಟರ್ನಲ್ಲಿ ಒಂದು ಪೋಸ್ಟ್ ಶೇರ್ ಮಾಡಿದ್ದರು. ನನಗೆ ಎಂಐ 10ಟಿ ಪ್ರೋ ಮೊಬೈಲ್ ಸಿಗುವವರೆಗೂ ನಾನು ಮದುವೆಯಾಗುವುದಿಲ್ಲ ಎಂದು ಟ್ವೀಟ್ನಲ್ಲಿ ಹೇಳಿಕೊಂಡಿದ್ದರು.
ಆಶ್ಚರ್ಯವೆಂದರೆ, ಆತ ಈ ರೀತಿ ಟ್ವೀಟ್ ಮಾಡಿ, ಕೇವಲ 10 ದಿನಕ್ಕೆ ಅಂದರೆ ಡಿಸೆಂಬರ್ 21ಕ್ಕೆ ಶಾವೊಮಿ ಸಂಸ್ಥೆಯು ಯುವಕನಿಗೆ ಎಂಐ 10ಟಿ ಪ್ರೋ ಫೋನನ್ನು ಉಡುಗೊರೆಯಾಗಿ ಕಳುಹಿಸಿಕೊಟ್ಟಿದೆ. ಆ ಫೋನನ್ನು ಪಡೆದುಕೊಂಡಿರುವ ಯುವಕ, ಇದೊಂದು ಅದ್ಭುತವಾದ ಫೋನು ಎಂದು ಹೇಳಿದ್ದಾರೆ. ಫೋನನ್ನು ಸಂಸ್ಥೆ ಗಿಫ್ಟ್ ಮಾಡಿರುವ ಬಗ್ಗೆ ಟ್ವಿಟ್ಟರ್ನಲ್ಲಿ ಹೇಳಿಕೊಂಡಿದ್ದಾರೆ.
ಅದಾದ ನಂತರ ಯುವಕನ ಟ್ವೀಟ್ನ್ನು ರಿಟ್ವೀಟ್ ಮಾಡಿರುವ ಶಾವೊಮಿಯ ಉಪಾಧ್ಯಕ್ಷ ಮತ್ತು ಶಿಯೋಮಿ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ಮನು ಕುಮಾರ್ ಜೈನ್, ‘ಈಗ ನೀವು ಮದುವೆಯಾಗಲು ಸಿದ್ಧರಿದ್ದೀರಿ ಎಂದು ನಾನು ಭಾವಿಸುತ್ತೇನೆ’ ಎಂದು ಹೇಳಿದ್ದಾರೆ.
