ಮಲ್ಪೆ: ಮುಂಜಾಗರೂಕತೆ ಇಲ್ಲದೆ ಮಲ್ಪೆ ಬೀಚ್‌ನಲ್ಲಿ ಈಜಾಟ: ಅಲೆಯ ಅಬ್ಬರಕ್ಕೆ ಸಿಲುಕಿದ ಆರು ಮಂದಿ ಪ್ರವಾಸಿಗರ ರಕ್ಷಣೆ

ಮಲ್ಪೆ: ಕಳೆದ ಕೆಲದ ದಿನಗಳಿಂದ ಕಡಲು ಪ್ರಕ್ಷುಬ್ಧವಾಗಿದ್ದು, ಮಲ್ಪೆ ಕಡಲ ಕಿನಾರೆಯಲ್ಲಿ ಅಲೆಗಳ ಅಬ್ಬರಕ್ಕೆ ಸಿಲುಕಿ ಮುಳುಗಿ ನೀರು ಪಾಲಾಗುತ್ತಿದ್ದ ಆರು ಮಂದಿ ಪ್ರವಾಸಿಗರನ್ನು ಜೀವ ರಕ್ಷಕ ದಳದ ಸಿಬ್ಬಂದಿ ರಕ್ಷಿಸಿದ್ದಾರೆ.

ಜೂ. 5 ರಂದು ಉತ್ತರ ಕರ್ನಾಟಕದ ಭಾಗದ ಪ್ರವಾಸಿಗರು ಮಲ್ಪೆ ಕಡಲ ಕಿನಾರೆಗೆ ಪ್ರವಾಸಕ್ಕೆ ಬಂದಿದ್ದರು. ಅತಿಯಾಗಿ ಮದ್ಯ ಸೇವನೆ ಮಾಡಿದ್ದ ಇವರಲ್ಲಿ ಕೆಲವರು ಸಮುದ್ರಕ್ಕಿಳಿದು ಈಜುತ್ತಿದ್ದರು. ಈ ವೇಳೆ ಅಲೆಗಳ ರಭಸಕ್ಕೆ ಸಿಲುಕಿ ಇಬ್ಬರು ಮುಳುಗುತ್ತಿದ್ದರು. ಕೂಡಲೇ ಜೀವರಕ್ಷಕ ದಳದ ಇಬ್ಬರನ್ನು ಮೇಲೆತ್ತಿ ರಕ್ಷಿಸಿದೆ. ಜೂ. 6 ರಂದು ಮಲ್ಪೆ ಬೀಚ್‌ನಲ್ಲಿ ಮುಳುಗುತ್ತಿದ್ದ ಬಿಜಾಪುರ ಮೂಲದ 4 ಪ್ರವಾಸಿಗರನ್ನು ಜೀವರಕ್ಷಕ ದಳ ಸಮಯಪ್ರಜ್ಞೆ ಮೆರೆದು ರಕ್ಷಿಸಿದೆ. ಜೀವರಕ್ಷಕ ದಳದಿಂದ ರಕ್ಷಣೆಗೆ ಒಳಗಾದವರನ್ನು ಮೊಬಿನು, ಸೋಫಿಯಾ ಅಹಮದ್‌, ಮೊಹಮ್ಮದ್ ಎಂದು ಗುರುತಿಸಲಾಗಿದೆ. ರಕ್ಷಣೆ ಮಾಡಿರುವ ಎಲ್ಲಾ ಪ್ರವಾಸಿಗರು 28 ರಿಂದ 30 ವರ್ಷ ವಯಸ್ಸಿನರಾಗಿದ್ದಾರೆ.