ಮಂಗಳೂರು: ನಗರದಲ್ಲಿ ಕೈಗಾರಿಕೆ, ಅಡುಗೆ ಮತ್ತು ವಾಣಿಜ್ಯ ಅಗತ್ಯಕ್ಕೆ ಅನಿಲ ಸರಬರಾಜು ಮಾಡುತ್ತಿರುವ ಗೇಲ್ ಕಂಪೆನಿಯು ಜಿಲ್ಲೆಯಾದ್ಯಂತ 100 ಸಿಎನ್ಜಿ ಸ್ಟೇಷನ್ ಗಳನ್ನು ಸ್ಥಾಪಿಸಲಿದೆ.
ಯೋಜನೆ ಪೂರ್ಣಗೊಳ್ಳಲು 8 ವರ್ಷಗಳ ಅವಧಿ ಬೇಕಾಗಿದ್ದು, ಪುತ್ತೂರು, ಸುಳ್ಯ, ನೆಲ್ಯಾಡಿಯಲ್ಲಿ ಶೀಘ್ರದಲ್ಲಿಯೇ ಘಟಕಗಳು ಆರಂಭವಾಗಲಿವೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ಮನೆ ಮನೆಗೆ ಕೊಳವೆ ಮೂಲಕ ಅಡುಗೆ ಅನಿಲವನ್ನು ತಲುಪಿಸುವ ಪಿಎನ್ಜಿ ಸೌಲಭ್ಯಕ್ಕೆ ಜಿಲ್ಲೆಯಲ್ಲಿ ಉತ್ತಮ ಬೇಡಿಕೆ ದೊರಕಿದ್ದು, ವಸತಿ ಸಮುಚ್ಛಯ, ಫ್ಲ್ಯಾಟ್, ಅಪಾರ್ಟ್ ಮೆಂಟ್ ಗಳಿಂದ 1 ಲಕ್ಷ್ಮಕ್ಕೂ ಅಧಿಕ ಅರ್ಜಿಗಳು ಬಂದಿರುತ್ತವೆ. ಭವಿಷ್ಯದಲ್ಲಿ 3 ಲಕ್ಷ್ಮದ 5 ಸಾವಿರ ಮನೆಗಳಿಗೆ ಈ ಸೌಲಭ್ಯ ಸಿಗಲಿದೆ. ಆರಂಭಿಕ ಘಟ್ಟದಲ್ಲಿ ಸುರತ್ಕಲ್, ಮೂಲ್ಕಿ, ಕುಳಾಯಿ ಮತ್ತು ಬೊಂದೆಲ್ ನಲ್ಲಿ ಸಂಪರ್ಕವನ್ನು ಕಲ್ಪಿಸಲಾಗಿದೆ ಎಂದು ತಿಳಿಸಲಾಗಿದೆ.
ಹೋಟೆಲ್ ರೆಸ್ಟಾರೆಂಟ್ ಸೇರಿ 40 ಕೈಗಾರಿಕೆ ಮತ್ತು 124 ವಾಣಿಜ್ಯ ಸಂಸ್ಥೆಗಳಿಗೆ ಪಿಎನ್ಜಿ ಸೌಲಭ್ಯವನ್ನು ನೀಡುವ ಸಂಬಂಧ ಒಪ್ಪಂದವಾಗಿದೆ. ಇನ್ನು ಸಿಎನ್ಜಿ ಘಟಕಗಳ ಮೂಲಕ ಬಂಟ್ವಾಳ, ಬೆಳ್ತಂಗಡಿ, ಪುತ್ತೂರು ಮತ್ತು ಸುಳ್ಯದಲ್ಲಿ ಅನಿಲವನ್ನು ಸರಬರಾಜು ಮಾಡಲಾಗುತ್ತಿದೆ. ಈ ಸೌಲಭ್ಯದ ಕುರಿತ ಹೆಚ್ಚಿನ ಮಾಹಿತಿಯನ್ನು ಪಿಎನ್ಜಿ ಮಿತ್ರ ಆ್ಯಪ್ ಮೂಲಕ ಪಡೆದುಕೊಳ್ಳಬಹುದು.
