ನೇಪಾಳ: ನೇಪಾಳದ ಖಾಸಗಿ ವಿಮಾನಯಾನ ಸಂಸ್ಥೆಯ ಸಣ್ಣ ವಿಮಾನವೊಂದು ಇಂದು ನಾಪತ್ತೆಯಾಗಿದೆ. ವಿಮಾನದಲ್ಲಿದ್ದ ಎಲ್ಲಾ 22 ಮಂದಿಯ ಸುಳಿವು ಪತ್ತೆಯಾಗದೆ ಸಂಬಂಧಿಕರು ಕಂಗಾಲಾಗಿದ್ದಾರೆ. ನಾಪತ್ತೆಯಾಗಿರುವ ವಿಮಾನದಲ್ಲಿ ಇದ್ದ 22 ಮಂದಿಯ ಪೈಕಿ ನಾಲ್ವರು ಭಾರತೀಯರೂ ಇದ್ದಾರೆ ಎಂದು ನೇಪಾಳದ ಸ್ಥಳೀಯ ಮಾಧ್ಯಮಗಳು ಮಾಹಿತಿ ನೀಡಿವೆ.
ನೇಪಾಳದ ಜನಪ್ರಿಯ ತಾರಾ ಏರ್ ಖಾಸಗಿ ವಿಮಾನ ಯಾನ ಸಂಸ್ಥೆಯ 2 NAET ಅವಳಿ ಎಂಜಿನ್‌ನ ಸಣ್ಣ ವಿಮಾನವು ಪ್ರವಾಸಿ ತಾಣವಾದ ಪೋಖಾರಾದಿಂದ ಮತ್ತೊಂದು ಪ್ರವಾಸಿ ತಾಣ ಜೋಮ್ ಸೋಮ್‌ಗೆ ಪ್ರಯಾಣ ಬೆಳೆಸಿತ್ತು. ಫೋಖಾರಾ ಪಟ್ಟಣವು ನೇಪಾಳ ರಾಜಧಾನಿ ಖಂಡುನಿಂದ 200 ಕಿ.ಮೀ ದೂರದಲ್ಲಿದೆ. ಇನ್ನು ಪೋಖಾರ ಹಾಗೂ ಜೋಮ್ ಸೋಮ್ ಪಟ್ಟಣಗಳ ನಡುವೆ 80 ಕಿ. ಮೀ. ಅಂತರವಿದೆ. ನೇಪಾಳದ ಸ್ಥಳೀಯ ಕಾಲಮಾನ ಭಾನುವಾರ ಬೆಳಗ್ಗೆ 9:55ರ ವೇಳೆಗೆ ಈ ವಿಮಾನವು ಪ್ರಯಾಣಿಕರನ್ನು ಹೊತ್ತು ಟೇಕ್ ಆಫ್ ಆಗಿತ್ತು. ಆದ್ರೆ, ಇದೀಗ ನಾಪತ್ತೆಯಾಗಿದೆ.
ಬಹುತೇಕ ಗುಡ್ಡಗಾಡು ಪ್ರದೇಶವನ್ನೇ ಹೊಂದಿರುವ ನೇಪಾಳದಲ್ಲಿ ಪ್ರವಾಸಿಗರನ್ನು ಒಂದು ತಾಣದಿಂದ ಮತ್ತೊಂದು ತಾಣಕ್ಕೆ ಅತಿ ಶೀಘ್ರವಾಗಿ ರವಾನಿಸಲು ಹೆಲಿಕಾಪ್ಟರ್ ಅಥವಾ ವಿಮಾನ ಬಳಕೆ ಮಾಡಲಾಗುತ್ತದೆ. ಪಂಚ ತಾರಾ ಹೋಟೆಲ್‌ಗಳಲ್ಲಿ ಉಳಿದು ಕೊಳ್ಳುವ ವಿದೇಶಿ ಪ್ರವಾಸಿಗರು ವಾಯು ಮಾರ್ಗದಲ್ಲಿ ನೇಪಾಳ ದೇಶದ ಹಲವು ಹಲವು ಪ್ರವಾಸಿ ತಾಣಗಳಿಗೆ ರವಾನೆ ಆಗುತ್ತಾರೆ. ಅದೇ ರೀತಿ ತಾರಾ ಏರ್ ಖಾಸಗಿ ವಿಮಾನವು ಎಂದಿನಂತೆ ಭಾನುವಾರ ಬೆಳಗ್ಗೆ ಪೋಖಾರ ಪಟ್ಟಣದಿಂದ ಜೋಮ್ ಸೋಮ್ ಪಟ್ಟಣಕ್ಕೆ ಹೊರಟಿತ್ತು. ಆದ್ರೆ, ಜೋಮ್ ಸೋಮ್ ಪಟ್ಟಣಕ್ಕೆ ವಿಮಾನ ಆಗಮಿಸಿಲ್ಲ ಹಾಗೂ ಆಗಸದಲ್ಲೂ ಕಂಡಿಲ್ಲ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ನೇಪಾಳದ ಮುಸ್ತಾಂಗ್ ಜಿಲ್ಲೆಯಲ್ಲಿ ಜೋಮ್ ಜೋಮ್ ಪ್ರವಾಸಿ ತಾಣ ಇದ್ದು, ಈ ಪಟ್ಟಣಕ್ಕೆ ವಿಮಾನ ಆಗಮಿಸಿಲ್ಲ ಹಾಗೂ ವಿಮಾನವನ್ನು ಯಾರೂ ಕಂಡಿಲ್ಲ ಎಂದು ಮುಸ್ತಾಂಗ್ ಜಿಲ್ಲಾಧಿಕಾರಿ ನೇತ್ರ ಪ್ರಸಾದ್ ಶರ್ಮಾ ಅವರು ಎಎನ್ಐ ಸುದ್ದಿ ಸಂಸ್ಥೆಗೆ ಅಧಿಕೃತ ಮಾಹಿತಿ ನೀಡಿದ್ದಾರೆ. ಈ ವಿಮಾನದಲ್ಲಿ ನಾಲ್ವರು ಭಾರತೀಯರು, ಮೂವರು ಜಪಾನ್ ದೇಶದ ಪ್ರಜೆಗಳು ಇದ್ದರು. ಮಿಕ್ಕವರು ನೇಪಾಳದ ಪ್ರಜೆಗಳು ಎಂದು ತಿಳಿದು ಬಂದಿದೆ. ಸಿಬ್ಬಂದಿ ಸೇರಿ ಒಟ್ಟು 22 ಮಂದಿ ಈ ವಿಮಾನದಲ್ಲಿ ಪ್ರಯಾಣ ಮಾಡುತ್ತಿದ್ದರು ಎಂದು ನೇಪಾಳದ ಸರ್ಕಾರಿ ಟಿವಿ ವಾಹಿನಿ ವರದಿ ಮಾಡಿದೆ.
