ಮಂಗಳೂರು: ತೆಕ್ಕಟ್ಟೆ ಸಮೀಪದ ಹಾರ್ದಳ್ಳಿ ಮಂಡಳ್ಳಿ ಗ್ರಾಮ ಪಂಚಾಯತಿ ವ್ಯಾಪ್ತಿಯ ಬಿಡ್ಕಲ್ಕಟ್ಟೆಯ ಎನ್ಆರ್ಎಲ್ಎಂ ‘ಸಮೃದ್ಧಿ ಸಂಜೀವಿನಿ’ ಒಕ್ಕೂಟದಲ್ಲಿ ಸುಮಾರು ₹33,50,000 ಹಣಕಾಸು ಅವ್ಯವಹಾರ ನಡೆದಿರುವ ಆರೋಪ ಕೇಳಿಬಂದಿದ್ದು, ಈ ಸಂಬಂಧ ಒಕ್ಕೂಟದ ಮುಖ್ಯ ಬರಹಗಾರ್ತಿ ಅಶ್ವಿನಿ (33) ವಿರುದ್ಧ ಕೋಟ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.
2022ರಿಂದ ಕಾರ್ಯನಿರ್ವಹಿಸುತ್ತಿದ್ದ ಅಶ್ವಿನಿ ಅವರಿಗೆ, ಸರ್ಕಾರದಿಂದ ಬಂದಿದ್ದ ಒಟ್ಟು ₹52.50 ಲಕ್ಷ ಅನುದಾನವನ್ನು ಬಿಡ್ಕಲ್ಕಟ್ಟೆಯ ಕೆನರಾ ಬ್ಯಾಂಕ್ ಶಾಖೆಯ ಮೂಲಕ ವ್ಯಾಪ್ತಿಯ 54 ಸ್ವಸಹಾಯ ಸಂಘಗಳಿಗೆ ಅಗತ್ಯಕ್ಕೆ ತಕ್ಕಂತೆ ಹಂಚಿಕೆ ಮಾಡುವ ಜವಾಬ್ದಾರಿಯಿತ್ತು. ಆದರೆ, ಅವರು ಈ ಹಣವನ್ನು ಅರ್ಹ ಸಂಘಗಳಿಗೆ ವಿತರಿಸದೆ ದುರುಪಯೋಗಪಡಿಸಿಕೊಂಡಿದ್ದಾರೆ ಎಂದು ಆರೋಪಿಸಲಾಗಿದೆ.
ಅಶ್ವಿನಿ ಅವರು ತಾವು ಅಧ್ಯಕ್ಷೆಯಾಗಿದ್ದ ‘ಮಂದಾರ ಸ್ವಸಹಾಯ ಸಂಘ’ ಹಾಗೂ ಇತರ ಸಂಘಗಳ ಸದಸ್ಯರ ಹೆಸರುಗಳನ್ನು ಬಳಸಿಕೊಂಡು, ಒಕ್ಕೂಟದ ಅಧ್ಯಕ್ಷರು, ಕಾರ್ಯದರ್ಶಿ ಮತ್ತು ಕೋಶಾಧಿಕಾರಿಗಳ ಅಧಿಕೃತ ಸೀಲ್ ಹಾಗೂ ಸಹಿಗಳನ್ನು ನಕಲಿ ಮಾಡಿದ್ದಾರೆ. ಜೊತೆಗೆ ವಿವಿಧ ಸ್ವಸಹಾಯ ಸಂಘಗಳ ಸದಸ್ಯರ ನಕಲಿ ಸಹಿಗಳನ್ನು ಸೃಷ್ಟಿಸಿ ಈ ಭಾರೀ ಮೊತ್ತವನ್ನು ವಂಚಿಸಿದ್ದಾರೆ.
ಒಕ್ಕೂಟದ ಖಾತೆಯ ಬ್ಯಾಂಕ್ ಮೆಸೇಜ್ಗಳು ಅಧ್ಯಕ್ಷರಿಗೆ ಬರುವುದು ನಿಂತಾಗ, ಅವರು ಬ್ಯಾಂಕ್ಗೆ ತೆರಳಿ ವಿಚಾರಿಸಿದಾಗ ಎಲ್ಲ ಸಂದೇಶಗಳು ಅಶ್ವಿನಿ ಅವರ ತಾಯಿಯ ಮೊಬೈಲ್ ಸಂಖ್ಯೆಗೆ ಹೋಗುತ್ತಿರುವುದು ಕಂಡುಬಂದಿದೆ. ತಕ್ಷಣ ಅಧಿಕಾರಿಗಳು ಲೆಕ್ಕಪತ್ರಗಳ ಪರಿಶೋಧನೆ ನಡೆಸಿದಾಗ ಈ ವಂಚನೆ ಸಂಪೂರ್ಣವಾಗಿ ಬೆಳಕಿಗೆ ಬಂದಿದೆ.
