ನವದೆಹಲಿ : ಮಹಾಮಾರಿ ಕೊರೊನಾ ದಿನದಿಂದ ದಿನಕ್ಕೆ ವೇಗವಾಗಿ ಎಲ್ಲೆಡೆ ವ್ಯಾಪಿಸುತ್ತಿದೆ. ನೆಮ್ಮದಿಯಿಂದ ಇದ್ದ ಹಳ್ಳಿಗಳನ್ನೂ ಕೂಡ ನರಕ ಮಾಡುತ್ತಿದೆ ಕೋವಿಡ್ . ಹಾಗಾಗಿ ಇದೀಗ ನಗರ ಹಳ್ಳಿ ಎಲ್ಲವೂ ಎಂಬಂತಾಗಿದೆ. ಎಲ್ಲಿ ನೋಡಿದರೂ ಕೊರೊನಾನದ್ದೇ ಮಾತು. ಈ ಕೊರೊನಾದ ಬಗ್ಗೆ ಸಾಕಷ್ಟು ಸುದ್ದಿಗಳು ಹರಿದಾಡುತ್ತಲೇ ಇವೆ. ಅದೇನಪ್ಪಾ ಅಂದ್ರೆ ಕೊರೊನಾ ಹಾಗೇ ಹರಡುತ್ತದೆ ಹೀಗೆ ಹರಡುತ್ತದೆ ಅಂತಾ. ಅದರಲ್ಲೂ ಕೋವಿಡ್ ಸೊಳ್ಳೆಗಳಿಂದ ಹರಡುತ್ತದೆ ಎಂಬ ವಿಚಾರಕ್ಕೆ ಸಂಬಂಧಪಟ್ಟಂತೆ ಇದೀಗ ವಿಜ್ಞಾನಿಗಳು ಖಚಿತವಾದ ಮಾಹಿತಿಯನ್ನು ನೀಡಿದ್ದಾರೆ.
ಕನ್ಸಾಸ್ ಸ್ಟೇಟ್ ಯೂನಿವರ್ಸಿಟಿಯ ಬಿಯೋಸೆಕ್ಯೂರಿಟಿ ರೀಸರ್ಚ್ ಇನ್ಸ್ಟಿಟ್ಯೂಟ್ನಲ್ಲಿ ಈ ಕುರಿತು ಅಧ್ಯಯನ ನಡೆಸಿದ ಸಂಶೋಧಕರು, ಸೊಳ್ಳೆಗಳಿಗೆ ಕೋವಿಡ್ ವೈರಾಣುವಿನ ಸೋಂಕು ತಗುಲಿಸಲು ಸಾಕಷ್ಟು ಪ್ರಯತ್ನಿಸಿದರು. ಪರಿಸರದಲ್ಲಿ ಇರದಂಥ ವಾತಾವರಣ ಸೃಷ್ಟಿಸಿ ಅದಕ್ಕೆ ಸೋಂಕು ಅಂಟಿಸಲು ಯತ್ನಿಸಲಾಯಿತು. ಆದರೆ, ಅದೆಷ್ಟೇ ಪ್ರಯತ್ನಿಸಿದರೂ ಸೊಳ್ಳೆಗಳಿಗೆ ಕೊರೊನಾ ಸೋಂಕು ತಗುಲಲೇ ಇಲ್ಲ ಎಂದು ಸಂಸ್ಥೆಯ ನಿರ್ದೇಶಕ ಸ್ಟೀಫನ್ ಹಿಗ್ಸ್ ತಿಳಿಸಿದ್ದಾರೆ.
ಸೊಳ್ಳೆಗಳ ದೇಹದಲ್ಲಿರುವ ರಕ್ತಕ್ಕೆ ಕೊರೊನಾ ವೈರಾಣುವನ್ನು ಚುಚ್ಚುಮದ್ದು ಮೂಲಕ ಕೊಟ್ಟಾಗ, ಆ ರಕ್ತದಲ್ಲಿ ವೈರಾಣುವಿಗೆ ದ್ವಿಗುಣಗೊಳ್ಳಲು ಸಾಧ್ಯವಾಗಲಿಲ್ಲ. ಹಾಗಾಗಿ ಸೊಳ್ಳೆಗಳ ರಕ್ತ ಪ್ರಮಾಣದಲ್ಲಿ ವೈರಾಣುಗಳ ಸಂಖ್ಯೆ ಹೆಚ್ಚಾಗಲಿಲ್ಲ. ಇದನ್ನು ಗಮನಿಸಿದಾಗ ಸೊಳ್ಳೆಗಳಿಂದ ಕೊರೊನಾ ವೈರಾಣು ಹರಡುವುದಿಲ್ಲ ಎಂಬುದು ಸ್ಪಷ್ಟವಾಗುತ್ತದೆ ಎಂದು ಹೇಳಿದ್ದಾರೆ.
ಉದಾಹರಣೆಗೆ ಡೆಂಘೀ ಅಥವಾ ಕಮಾಲೆ ರೋಗವನ್ನು ತೆಗೆದುಕೊಳ್ಳುವುದಾದರೆ, ಈ ಕಾಯಿಲೆಗಳಿಗೆ ಕಾರಣವಾಗುವ ವೈರಾಣುಗಳ ರೀತಿ ಕೊರೊನಾ ವೈರಾಣುವಿನ ಪ್ರಮಾಣ ಸೊಳ್ಳೆಯ ರಕ್ತದಲ್ಲಿ ಗರಿಷ್ಠ ಪ್ರಮಾಣ ತಲುಪುವುದಿಲ್ಲ. ಕೊರೊನಾ ಸೋಂಕಿತರನ್ನು ಕಚ್ಚಿದರೂ ಸೊಳ್ಳೆಗಳ ದೇಹದಲ್ಲಿ ಕೊರೊನಾ ವೈರಾಣು ದ್ವಿಗುಣಗೊಳ್ಳುವುದಿಲ್ಲ ಎಂದು ವಿವರಿಸಿದ್ದಾರೆ. ಈ ಮೂಲಕ ಸೊಳ್ಳೆಗಳಿಂದ ಕೊರೊನಾ ಹರಡುತ್ತದೆ ಎಂಬ ವಿಚಾರವನ್ನು ವಿಜ್ಞಾನಿಗಳು ಸಂಪೂರ್ಮವಾಗಿ ಅಲ್ಲಗಳೆದಿದ್ದಾರೆ.