ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಜೊ ಬೈಡನ್ ಅವರು ವಿಮಾನ ಹತ್ತುವ ವೇಳೆ ಮೆಟ್ಟಿಲುಗಳಿಂದ ಮೂರು ಬಾರಿ ಜಾರಿ ಬಿದ್ದಿರುವ ಘಟನೆ ಶುಕ್ರವಾರ ಆಂಡ್ರೋ ಏರ್ಬೇಸ್ನಲ್ಲಿ ನಡೆದಿದೆ.
ಅಮೇರಿಕ ಅಧ್ಯಕ್ಷ ಜೋ ಬಿಡನ್ ಅವರು ಅಟ್ಲಾಂಟಾಗೆ ಭೇಟಿ ನೀಡುತ್ತಿದ್ದರು, ಅಲ್ಲಿ ಅವರು ಏಷ್ಯನ್-ಅಮೇರಿಕನ್ ಸಮುದಾಯದ ಮುಖಂಡರನ್ನು ಭೇಟಿಯಾಗಬೇಕಿತ್ತು. ‘ದಿ ಸನ್’ ವರದಿಯ ಪ್ರಕಾರ, ಅವರು ಅಟ್ಲಾಂಟಾಗೆ ತೆರಳಲು ಏರ್ ಫೋರ್ಸ್ ಒನ್ ವಿಮಾನ ಹತ್ತಲು ಮೆಟ್ಟಿಲುಗಳನ್ನು ಏರಲು ಮುಂದಾದಾಗ ಬ್ಯಾಲೆನ್ಸ್ ತಪ್ಪಿ ಅವರು ಮೆಟ್ಟಿಲುಗಳ ಮೇಲೆ ಎಡವಿದರು. ಈ ಘಟನೆ ಬಿಡೆನ್ಗೆ ಒಮ್ಮೆ ಅಲ್ಲ ಮೂರು ಬಾರಿ ಸಂಭವಿಸಿದೆ. ಆದರೂ ಸಾವರಿಸಿಕೊಂಡು ವಿಮಾನವನ್ನ ಹತ್ತಿದ್ದ ಬಳಿಕ ಏನೂ ಆಗಿಲ್ಲವೆನ್ನುವಂತೆ ಸೆಲ್ಯೂಟ್ ಮಾಡಿ ವಿಮಾನದ ಒಳಕ್ಕೆ ಹೋಗಿದ್ದಾರೆ. ಶ್ವೇತಭವನದ ಮಾಧ್ಯಮ ಕಾರ್ಯದರ್ಶಿ ಜಿನ್ ಪಿಯರೇ ಜೋ ಬಿಡೆನ್ ಕ್ಷೇಮವಾಗಿದ್ದಾರೆ ಎಂದು ಮಾಹಿತಿ ನೀಡಿದ್ದಾರೆ.
78 ವರ್ಷದ ಜೋ ಬೈಡನ್ ಅವರು ಎಡವಿ ಬಿದ್ದರೂ ತಮ್ಮ ವೈದ್ಯಕೀಯ ಸಿಬ್ಬಂದಿಗೆ ಕರೆ ಮಾಡದಿರುವುದು ಅಚ್ಚರಿ ಮೂಡಿಸಿತು. ಮೆಟ್ಟಿಲನ್ನ ಹತ್ತುತ್ತಿದ್ದ ವೇಳೆಯ ಜೋರಾಗಿ ಗಾಳಿ ಬೀಸುತ್ತಿತ್ತು. ಹೀಗಾಗಿ 78 ವರ್ಷದ ಜೋ ಬಿಡೆನ್ ಆಯತಪ್ಪಿದ್ದಾರೆ ಎನ್ನಲಾಗಿದೆ.
ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿರುವ ಈ ವಿಡಿಯೋವನ್ನು ಈವರೆಗೆ ಹಲವು ಮಂದಿ ನೋಡಿದ್ದು ರಾಷ್ಟ್ರಪತಿಗಳ ಆರೋಗ್ಯದ ಬಗ್ಗೆ ಜನರು ಕಳವಳ ವ್ಯಕ್ತಪಡಿಸುತ್ತಿದ್ದಾರೆ. ಅಲ್ಲದೇ ಅವರು ವಿರೋಧಿಗಳು ಈ ಘಟನೆಯನ್ನು ಅವರನ್ನು ಟೀಕಿಸಲು ಬಳಸಿಕೊಂಡಿದ್ದಾರೆ. ಅಧ್ಯಕ್ಷರಿಗೆ ವಯಸ್ಸಾಗಿದೆ, ನಡೆಯುವುದೂ ಕಷ್ಟ ಎಂದು ಗೇಲಿ ಮಾಡಿದ್ದಾರೆ.