ಕಾಸರಗೋಡು: ಕರ್ನಾಟಕ, ಆಂಧ್ರಪ್ರದೇಶ, ಗೋವಾ ರಾಜ್ಯಗಳಿಂದ ಕೇರಳದ ಮಾರುಕಟ್ಟೆಗಳಿಗೆ ಹಳಸಿದ ಮೀನುಗಳನ್ನು ಅಕ್ರಮವಾಗಿ ಸಾಗಿಸುತ್ತಿರುವುದು ಗಮನಕ್ಕೆ ಬಂದ ಹಿನ್ನೆಲೆಯಲ್ಲಿ ಆಹಾರ ಸುರಕ್ಷತಾ ಇಲಾಖೆಯ ಜಿಲ್ಲಾ ಉಪ ಆಯುಕ್ತರ ನೇತೃತ್ವದಲ್ಲಿ ತಪಾಸಣೆ ನಡೆಸಲಾಯಿತು.
ಅದರಂತೆ ಮಂಜೇಶ್ವರ ಚೆಕ್‌ ಪೋಸ್ಟ್‌ನಲ್ಲಿ ಆಹಾರ ಭದ್ರತಾ ಅಧಿಕಾರಿಗಳು ಮೀನುಗಳನ್ನು ತಪಾಸಣೆಗೊಳಪಡಿಸಿದ್ದಾರೆ. ಗಡಿ ಚೆಕ್‌ ಪೋಸ್ಟ್‌ಗಳಲ್ಲಿ ಆಹಾರ ಭದ್ರತಾ ಘಟಕದ ನೇತೃತ್ವದಲ್ಲಿ ತಪಾಸಣೆ ನಡೆಯಿತು. ಮುಂದಿನ ದಿನಗಳಲ್ಲಿ ತಪಾಸಣೆ ಮುಂದುವರಿಯಲಿದೆ ಎಂದು ಜಿಲ್ಲಾ ಆಹಾರ ಸುರಕ್ಷತೆ ಉಪ ಆಯುಕ್ತರು ತಿಳಿಸಿದ್ದಾರೆ. ಕಾಸರಗೋಡು ನಗರಸಭೆಯ ಮೀನು ಮಾರುಕಟ್ಟೆಯಲ್ಲಿ 200 ಕೆಜಿ ಹಳಸಿದ ಮೀನುಗಳನ್ನು ಕಾಸರಗೋಡು ನಗರಸಭೆಯ ಆರೋಗ್ಯ ವಿಭಾಗ ಹಾಗೂ ಆಹಾರ ಸುರಕ್ಷಾ ಇಲಾಖೆ ಜಂಟಿಯಾಗಿ ನಡೆಸಿದ ತಪಾಸಣೆಯಲ್ಲಿ ಪತ್ತೆ ಹಚ್ಚಿದೆ. ಎಂಟು ಬಾಕ್ಸ್ಗಳಲ್ಲಿ ಹಾಳಾದ ಬೂತಾಯಿ ಮೀನು ಪತ್ತೆಯಾಗಿದೆ.
ಇದು ಕಾಸರಗೋಡು ಮಾರುಕಟ್ಟೆಗೆ ತಮಿಳುನಾಡಿನ ವೆಲಾಕಣ್ಣಿನಿಂದ ರವಾನಿಸಿ ಮೀನು ಎಂದು ತಿಳಿದುಬಂದಿದೆ. ಮಾರುಕಟ್ಟೆಯಲ್ಲಿ ರಾಸಾಯಿನಿಕ ಪದಾರ್ಥ ಬೆರೆಸಿದ ಮೀನುಗಳನ್ನು ಮಾರಾಟ ಮಾಡುತ್ತಾರೆಂಬ ದೂರಿನ ಹಿನ್ನೆಲೆಯಲ್ಲಿ ಈ ತಪಾಸಣೆ ನಡೆಸಲಾಗಿದೆ. ವಾಹನದಲ್ಲಿದ್ದ 25 ಕಿಲೋ ತೂಕದ 55 ಪೆಟ್ಟಿಗಳಲ್ಲಿ ಈ ಮೀನು ಪತ್ತೆಯಾಗಿದೆ. ಇದರಲ್ಲಿ ಎಂಟು ಪೆಟ್ಟಿಗೆಗಳಲ್ಲಿ ಹಾಳಾದ ಮೀನು ಪತ್ತೆಯಾಗಿದೆ. ಪತ್ತೆ ಹಚ್ಚಿದ ಮೀನುಗಳನ್ನು ನಗರಸಭೆ ವ್ಯಾಪ್ತಿಯ ಸ್ಥಳದಲ್ಲಿ ಹೂಳಲಾಯಿತು. ಆಹಾರ ಸುರಕ್ಷಾ ಆಯುಕ್ತರಿಗೆ ವರದಿ ನೀಡಿದ ಬಳಿಕ ಮುಂದಿನ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಲಾಗಿದೆ.
ಕಾರ್ಯಾಚರಣೆಯಲ್ಲಿ ಆಹಾರ ಸುರಕ್ಷಾ ಸಹಾಯಕ ಆಯುಕ್ತ ಪಿ.ಕೆ. ಜೋನ್‌ ವಿಜಯ ಕುಮಾರ್‌ ನೇತೃತ್ವದಲ್ಲಿ ಮೀನುಗಾರಿಕಾ ಅಧಿಕಾರಿ ಅನಿಲ್‌ ಕುಮಾರ್‌, ನಗರಸಭೆ ಕಾರ್ಯದರ್ಶಿ ಎಸ್‌. ಬಿಜು, ಕೆ.ಪಿ. ಮುಸ್ತಫಾ, ನೋಡಲ್‌ ಅಧಿಕಾರಿ ಹೇಮಾಂಬಿಕಾ, ನಗರಸಭೆ ಹೆಲ್ತ್‌ ಇನ್ಸ್‌ಪೆಕ್ಟರ್‌ ಎ. ಅನೀಸ್‌ ಜೂನಿಯರ್‌ ಹೆಲ್ತ್‌ ಇನ್ಸ್‌ಪೆಕ್ಟರ್‌ ಪಿ.ಟಿ. ರೂಪೇಶ್‌, ಟಿ. ಸುಧೀರ್‌ ಮುಂತಾದವರು ಪಾಲ್ಗೊಂಡರು.
ಕಾಸರಗೋಡು ನಗರಸಭೆ ಅಧೀನದ ಮಾರುಕಟ್ಟೆಯಲ್ಲಿ ಹಳಸಿದ ಮೀನು ವಶಪಡಿಸಿಕೊಂಡ ಘಟನೆಯನ್ನು ಫಿಶ್‌ ಮರ್ಚೆಂಟ್ಸ್‌ ಆ್ಯಂಡ್‌ ಕಮಿಷನ್‌ ಏಜೆಂಟ್ಸ್‌ ಜಿಲ್ಲಾ ಸಮಿತಿ ವಿರೋಧಿಸಿದೆ. ಹಾಳಾದ ಮೀನು ಎಂದು ಸುಮಾರು 40,000 ರೂ. ಮೌಲ್ಯದ ಮೀನು ವಶಪಡಿಸಿಕೊಂಡಿರುವುದಾಗಿ ಆರೋಪಿಸಿದರು. ವಶಪಡಿಸಿಕೊಂಡ ಮೀನುಗಳನ್ನು ಕ್ಲೋರಿನ್‌ ಉಪಯೋಗಿಸಿ ತಪಾಸಣೆ ನಡೆಸಬೇಕೆಂದು ಆಗ್ರಹಿಸಿದರೂ ಅಧಿಕಾರಿಗಳು ಸಿದ್ಧರಾಗಲಿಲ್ಲ. ಈ ಬಗ್ಗೆ ಸಂಘಟನೆಯ ಅಬ್ದುಲ್‌ ರಶೀದ್‌ ಎಂಬವರು ಜಿಲ್ಲಾ ಗ್ರಾಹಕರ ಪರಿಹಾರ ವೇದಿಕೆಗೆ ದೂರು ನೀಡಿದ್ದಾರೆ.
