ಇನ್ನೇನು ವಾಲೆಂಟೈನ್ಸ್ ಡೇಗೆ ಕೆಲವೇ ದಿನಗಳು ಬಾಕಿ ಇದೆ. ಪ್ರೇಮಿಗಳು ಈ ಬಾರಿಯ ವಾಲೆಂಟೈನ್ಸ್ ನ್ನು ಹೇಗೆ ಆಚರಿಸೋದು ಅಂತಾ ಯೋಚ್ನೆ ಮಾಡುತ್ತಿದ್ದಾರೆ. ಇನ್ನು ಲವ್ವರ್ ಇಲ್ಲದವರು ಇಲ್ವಲ್ಲಾ ಅಂತಾ ಬೇಸರ ಮಾಡಿಕೊಳ್ಳುವ ಹುಡುಗಿಯರಿಗೆ ನಾನಿದ್ದೇನೆ ಅಂತಿದ್ದಾನೆ ಇಲ್ಲೊಬ್ಬ ಭೂಪ..
ಹೌದು.. ನೀವು ಬಾಡಿಗೆ ಕೊಟ್ಟರೆ ನಾನು ಬಾಯ್ಫ್ರೆಂಡ್ ಆಗೋಕೆ ರೆಡಿ ಇದ್ದೀನಿ ಎಂದು ಬೋರ್ಡ್ ಹಿಡಿದುಕೊಂಡು ತಿರುಗುತ್ತಾ ಇದ್ದಾನೆ ಯುವಕನೊಬ್ಬ. ಅಂದಹಾಗೆ ಈತ ಈ ಉದ್ಯಮವನ್ನ ಕಳೆದ ಮೂರು ವರ್ಷಗಳಿಂದ ಮಾಡುತ್ತಾ ಬಂದಿದ್ದಾನೆ.
ಅಂದಹಾಗೆ ಈ ಬಾಡಿಗೆ ಬಾಯ್ಫ್ರೆಂಡ್ನ ಹೆಸರು ಶಕುಲ್. ಅನೇಕರಿಂದ ತಿರಸ್ಕರಿಸಲ್ಪಟ್ಟು ಪ್ರೀತಿಯಲ್ಲಿ ಹಲವಾರು ಬಾರಿ ವಿಫಲನಾದ ಬಳಿಕ ಬೇಸತ್ತು ಶಕುಲ್ ಈ ಉದ್ಯಮವನ್ನ ಆರಂಭಿಸಿದ್ದಾನಂತೆ.
ಪ್ರತಿ ಬಾರಿ ವ್ಯಾಲೆಂಟೈನ್ಸ್ ಡೇ ಬಂದಾಗಲೂ ಪ್ರೇಮ ನಿವೇದನೆ ವಿಚಾರದಲ್ಲಿ ತಾನೆಷ್ಟು ನತದೃಷ್ಟ ಎಂದು ಶಕುಲ್ಗೆ ಅನಿಸುತ್ತಂತೆ. ಶಕುಲ್ ಇಲ್ಲಿಯವರೆಗೆ ಪ್ರೇಮ ನಿವೇದನೆ ಮಾಡಿದ ಪ್ರತಿಯೊಬ್ಬ ಹುಡುಗಿಯರೂ ಈತನನ್ನ ನಿರಾಕರಿಸಿದ್ದು ಕೇವಲ ನಿನ್ನ ಸ್ನೇಹ ಮಾತ್ರ ಸಾಕು ಎಂದು ಹೇಳಿದ್ದಾರಂತೆ.
ಇಷ್ಟೆಲ್ಲಾ ಕತೆ ಬಳಿಕ ಒಂದಿನ ಶಕುಲ್ಗೆ ನನ್ನಂತೆ ಕೆಲ ಹುಡುಗಿಯರಿಗೂ ಇಂತಹ ಅನುಭವ ಆಗಿರಬಹುದು. ಅವರನ್ನೂ ಅನೇಕರು ನಿರಾಕರಿಸಿದ್ದಿರಬಹುದು ಎಂದು ಅನಿಸಿತಂತೆ.
ಹೀಗಾಗಿ ಕಳೆದ ಮೂರು ವರ್ಷಗಳಿಂದ ಈತ ವ್ಯಾಲೆಂಟೈನ್ಸ್ ಡೇಯಂದು ಬಾಡಿಗೆ ಬಾಯ್ಫ್ರೆಂಡ್ ಆಗಿ ಕೆಲಸ ಮಾಡುತ್ತಾನೆ. ಈತನಿಗೆ ಈಗ ಅನೇಕ ಮಹಿಳೆಯರು ಹಾಗೂ ಯುವತಿಯರು ಬಾಡಿಗೆಗೆ ಬೇಕೆಂದು ಮೆಸೇಜ್ ಮಾಡುತ್ತಾರಂತೆ. ಕಳೆದ ಮೂರು ವರ್ಷಗಳಲ್ಲಿ ಈತ 45ಕ್ಕೂ ಹೆಚ್ಚು ಮಹಿಳೆಯರ ಜೊತೆ ಡೇಟಿಂಗ್ ಮಾಡಿದ್ದಾನಂತೆ.