ಮಡಿಕೇರಿ: ಕೊರೊನಾ ಸಂಕಷ್ಟದ ಸಮಯದಲ್ಲಿ ಕೆಲವೊಂದು ಕ್ರಿಯಾತ್ಮಕ ಚಟುವಟಿಕೆಗಳಿಗೂ ವೇದಿಕೆ ಸಿಗುತ್ತಿದೆ. ವೈವಿಧ್ಯಮಯ ಕಾರ್ಯ ಕ್ರಮಗಳನ್ನು ಸಂಘಟಿಸುವ ಮೂಲಕ ಸಾಮಾಜಿಕ ಜಾಲತಾಣಗಳನ್ನು ಹೀಗೂ ಬಳಸಬಹುದು ಎನ್ನುವುದನ್ನು ಆಸಕ್ತರು ತೋರಿಸಿ ಕೊಡುತ್ತಿದ್ದಾರೆ. ಆಗಸ್ಟ್ 3 ರಂದು ನಡೆಯಲಿರುವ ‘ವಿಶ್ವ ಅರೆಭಾಷೆ ಹಬ್ಬ ಆಟಿ-18’ ಎನ್ನುವ ವಿಶಿಷ್ಟ ಕಾರ್ಯಕ್ರಮ ಇದಕ್ಕೊಂದು ಉದಾಹರಣೆ.
ಫೇಸ್ಬುಕ್ನಲ್ಲಿ ಈ ಹಬ್ಬ ಏರ್ಪಡಿಸಲಾಗಿದ್ದು, ನಡೆದಿರುವ ಸಿದ್ಧತೆ ಈಗಾಗಲೇ ಸಾಮಾಜಿಕ ಜಾಲತಾಣಗಳಲ್ಲಿ ದೊಡ್ಡ ಸದ್ದು ಮಾಡುತ್ತಿದೆ. ಕೊಡಗು, ದಕ್ಷಿಣ ಕನ್ನಡ ಹಾಗೂ ಕೇರಳದ ಕೆಲವು ಭಾಗಗಳಲ್ಲಿ ಬಳಕೆಯಾಗುತ್ತಿರುವ ಅರೆಭಾಷೆಯು ಕನ್ನಡದ ಒಂದು ಉಪ ಭಾಷೆ. ಹವ್ಯಕ ಕನ್ನಡದಂತೆಯೇ ಕೇಳಿಬರುವ ಈ ವಿಶಿಷ್ಟ ಭಾಷೆ ಈ ಭಾಗದಲ್ಲಿ ವಾಸ ಮಾಡುವ ಗೌಡ ಜನಾಂಗದವರ ಮನೆ ಮಾತು. ದಕ್ಷಿಣ ಕನ್ನಡದ ಸುಳ್ಯ, ಕೊಡಗಿನ ಭಾಗಮಂಡಲ, ಮರಗೋಡು ಮತ್ತಿತರ ಪ್ರದೇಶಗಳಲ್ಲಿ ಜಾತಿ, ಧರ್ಮದ ಹಂಗು ಇಲ್ಲದೆ ಇದು ಜನಸಾಮಾನ್ಯರ ಭಾಷೆಯಾಗಿ ಬಳಕೆಯಲ್ಲಿದೆ.
![](https://scontent.fblr1-3.fna.fbcdn.net/v/t1.0-9/111090193_2707738439458246_7702215004417976174_o.jpg?_nc_cat=106&_nc_sid=110474&_nc_ohc=fb83lAwRbrIAX_2GQ7X&_nc_ht=scontent.fblr1-3.fna&oh=41bac57abb1122173c78147a1bfa0e9d&oe=5F44052A)
ಆಂಗಿಕ ಮಲ್ಟಿಮೀಡಿಯಾ ಫೇಸ್ಬುಕ್ ಪೇಜ್ನಲ್ಲಿ ಕಾರ್ಯಕ್ರಮ
ಅರೆಭಾಷೆಯ ಜೊತೆ ವೈಶಿಷ್ಟ್ಯ ಪೂರ್ಣ ಸಂಸ್ಕೃತಿ, ಸಂಪ್ರದಾಯವೂ ಥಳಕು ಹಾಕಿಕೊಂಡಿದೆ. ಇದರ ಅನಾವರಣಕ್ಕೆ ವೇದಿಕೆಯಾಗಿ ‘ವಿಶ್ವ ಅರೆಭಾಷೆ ಹಬ್ಬ ಆಟಿ-18’ ಕಾರ್ಯಕ್ರಮ ಸಂಘಟಿಸಲಾಗಿದೆ. ಆಂಗಿಕ ಮಲ್ಟಿಮೀಡಿಯಾ ಫೇಸ್ಬುಕ್ ಪೇಜ್ನಲ್ಲಿ ಆ. 3ರ ಸೋಮವಾರ ‘ವಿಶ್ವ ಅರೆಭಾಷೆ ಹಬ್ಬ ಆಟಿ-18’ ಕಾರ್ಯಕ್ರಮ ನಡೆಯಲಿದ್ದು, ಜಗತ್ತಿನಾದ್ಯಂತ ಹರಡಿರುವ ಅರೆಭಾಷಿಕ ಸಮೂಹವನ್ನು ವಯಸ್ಸಿನ ಭೇದವಿಲ್ಲದೇ ಒಂದೇ ‘ಫೇಸ್ ಬುಕ್ ಪೇಜ್’ ಒಳಗೆ ಕರೆತರುವ ಪ್ರಯತ್ನ ಮಾಡಲಾಗುತ್ತಿದೆ.
ಹಲವು ಸಂಘಟನಾ ಸಮಿತಿಯಿಂದ ಆಯೋಜನೆ
ಆಂಗಿಕ ಮಲ್ಟಿಮೀಡಿಯಾ ಜೊತೆಗೆ ಸುಳ್ಯದ ಸೂರಡಿ ಬಳಗ, ಜೆ.ಸಿ.ಐ. ಸುಳ್ಯಸಿಟಿ, ಅರೆಭಾಷೆ ಪರಿಷತ್, ವ್ಯಾಟ್ಸಪ್ ಗ್ರೂಪ್, ಭಾಗಮಂಡಲದ ನಾಟ್ಯ ಮಿಲನ ಟ್ರಸ್ಟ್, ಅಮರ ಸುಳ್ಯ ಸಂಘಟನಾ ಸಮಿತಿ ಹಾಗೂ ರೂಪೇಶ್ ಫೋಟೋಗ್ರಫಿ ಸೇರಿಕೊಂಡು ಈ ಕಾರ್ಯಕ್ರಮ ಮಾಡಲಾಗುತ್ತಿದೆ.
![](https://scontent.fblr1-4.fna.fbcdn.net/v/t1.0-9/s960x960/109419760_3083071675139950_6329459002573913091_o.jpg?_nc_cat=104&_nc_sid=110474&_nc_ohc=GZ1PlFcqk4YAX_Tm_uq&_nc_ht=scontent.fblr1-4.fna&_nc_tp=7&oh=a27e44b544cf2433cfbf44c0bacb2e0e&oe=5F44C1C3)
ತಲೆಮಾರಿಗೆ ತಿಳಿಸಿಕೊಡುವ ಉದ್ದೇಶ
ದಕ್ಷಿಣಕನ್ನಡ ಮತ್ತು ಕೊಡಗಿನಲ್ಲಿರುವ ಅರೆಭಾಷಿಕ ಸಮುದಾಯದ ಭಾಷೆ ಒಂದೇ ಆದರೂ, ಬಳಕೆಯಲ್ಲಿ ಸ್ವಲ್ಪ ವ್ಯತ್ಯಾಸ ಗಮನಿಸಬಹುದು. ಅಲ್ಲದೆ ಸಂಪ್ರದಾಯ, ಆಚರಣೆಗಳಲ್ಲೂ ಒಂದಿಷ್ಟು ವೈವಿಧ್ಯತೆ ಇದೆ. ಸಂಸ್ಕೃತಿ, ಹಾಡು-ಹಸೆ, ಜಾನಪದ, ಕೃಷಿ ಕಾಯಕ, ಆಟೋಟ, ಆಹಾರ ಪದ್ಧತಿ, ಹಬ್ಬಗಳ ಆಚರಣೆಯಲ್ಲೂ ಕೆಲವೊಂದು ಭಿನ್ನತೆಗಳನ್ನು ಗುರುತಿಸಬಹುದು. ಇದನ್ನೆಲ್ಲಾಇಂದಿನ ತಲೆಮಾರಿಗೆ ತಿಳಿಸಿಕೊಡುವ ಉದ್ದೇಶವನ್ನು ಕಾರ್ಯಕ್ರಮ ಹೊಂದಿದೆ.
ಅರೆಭಾಷೆ ಗಣ್ಯರು ಭಾಗಿ
ಅರೆಭಾಷೆ ಸೀಮೆಯ ಪ್ರಸಿದ್ಧ ಕಲಾವಿದರು, ವಿದ್ವಾಂಸರು, ಬರಹಗಾರರು, ಸಂಘಟಕರು, ವಿಷಯ ಪರಿಣಿತರು ಆ ದಿನ ಫೇಸ್ಬುಕ್ ಲೈವ್ನಲ್ಲಿ ಬಂದು ತಮ್ಮ ತಮ್ಮ ಕ್ಷೇತ್ರದ ಕುರಿತು ಮಾಹಿತಿಗಳನ್ನು ಹಂಚಿಕೊಳ್ಳಲಿದ್ದಾರೆ. ಆಚಾರ-ವಿಚಾರ, ಸಂಸ್ಕೃತಿ ಸೇರಿದಂತೆ ಅರೆಭಾಷೆಗೆ ಸಂಬಂಧಿಸಿದ ಯಾವುದೇ ವಿಷಯಗಳನ್ನಾದರೂ ಆಸಕ್ತರು ಹಂಚಿಕೊಳ್ಳಲು ಕೂಡ ಅವಕಾಶ ಮಾಡಿಕೊಳ್ಳಲಾಗಿದೆ. ಜಾತಿ-ಧರ್ಮಗಳ ಕಟ್ಟುಪಾಡು ಇಲ್ಲದೆ ಅರೆಭಾಷೆ ಅಭಿಮಾನಿಗಳೆಲ್ಲರೂ ಭಾಗವಹಿಸಲು ಸಂಘಟಕರು ಕಾರ್ಯಕ್ರಮದ ಬಾಗಿಲನ್ನು ತೆರೆದಿಟ್ಟಿದ್ದಾರೆ.
ವೈವಿಧ್ಯಮಯ ಸ್ಪರ್ಧೆ
‘ಅರೆಭಾಷೆ ಬೆರಿ ಭಾಷೆ ಅಲ್ಲ ಬೊದ್ಕುನ ಬೇರ್’ ಎನ್ನುವ ಘೋಷವಾಕ್ಯದಡಿಯಲ್ಲಿ ನಡೆಯುವ ಕಾರ್ಯಕ್ರಮದಲ್ಲಿ ವಿಭಿನ್ನ ಸ್ಪರ್ಧೆಗಳನ್ನೂ ಏರ್ಪಡಿಸಿ ನಗದು ಬಹುಮಾನ ಇಡಲಾಗಿದೆ. ಅರೆಭಾಷೆ ಗಾದೆಗಳ ಸಂಗ್ರಹ ಗಾದೆನ ಜೊಂಪೆ, ಸಾಂಪ್ರದಾಯಿಕ ಕೊಡಗು ವಾಲಗ ನೃತ್ಯ ವಾಟ್ಸಪ್ ಸ್ಪರ್ಧೆ, ಅರೆಭಾಷೆ ಸಂಸ್ಕೃತಿ, ಸಾಹಿತ್ಯ ಜಾನಪದಕ್ಕೆ ಸಂಬಂಧಿಸಿದ ಮೊಬೈಲ್ ಫೋಟೋಗ್ರಫಿ ಸ್ಪರ್ಧೆಗಳು ನಡೆಯಲಿದೆ.
![](https://scontent.fblr1-5.fna.fbcdn.net/v/t1.0-9/115791699_3110533695727081_6902290562037671091_n.jpg?_nc_cat=111&_nc_sid=85a577&_nc_ohc=LotiHJhg3fIAX_Mk4sT&_nc_ht=scontent.fblr1-5.fna&oh=183efd69545f024ea7276567c702d40f&oe=5F46C804)
ಕೊರೊನಾ ಕಾರಣದಿಂದ ಸಾರ್ವಜನಿಕರನ್ನು ಒಟ್ಟು ಸೇರಿಸಿ ಕಾರ್ಯಕ್ರಮ ಮಾಡುವುದಕ್ಕೆ ಅವಕಾಶ ಇಲ್ಲ. ಹಾಗಾಗಿ ಫೇಸ್ಬುಕ್ನಲ್ಲಿ ನಡೆಸುವ ಮೂಲಕ ಹೊಸ ಪ್ರಯೋಗಕ್ಕೆ ಮುಂದಾಗಿದ್ದೇವೆ. ಅರೆಭಾಷೆಯನ್ನು ಉಳಿಸಿ-ಬೆಳೆಸುವ ನಿಟ್ಟಿನಲ್ಲಿ ಯುವಜನಾಂಗದ ತೊಡಗಿಸಿಕೊಳ್ಳುವಿಕೆಗೆ ಇದು ಸಹಕಾರಿ ಆಗಬಲ್ಲದು ಎನ್ನುವ ಆಶಯ ನಮ್ಮದು.
ಲೋಕೇಶ್ ಊರುಬೈಲು, ಕಾರ್ಯಕ್ರಮ ಸಂಘಟಕ